Тимур Сүлейменов банктерді бизнеске қолайлы жағдай жасауға шақырды

АЛМАТЫ. KAZINFORM – Алматыда «Қазақстанның қаржы секторы: стратегиялық сын-қатерлерге 25 жыл» атты қаржыгерлер форумы өтіп жатыр. ҚР Ұлттық банк төрағасы Тимур Сүлейменов еліміздің экономикалық дамуын қамтамасыз етудегі қаржы секторының рөлі туралы айтты.

ҚР Ұлттық банк төрағасы Тимур Сүлейменов еліміздің экономикалық дамуын қамтамасыз етудегі қаржы секторының рөлі туралы айтты.

«Біз қазір жаңа міндеттер алдында тұрмыз. Мемлекет басшысы нақты секторды несиелендірудің жыл сайынғы өсімін кемінде 20%-ға қамтамасыз ету деген ауқымды мақсат қойды. Мақсатқа қол жеткізу еліміздің экономикалық дамуын қамтамасыз етіп, бизнеске қолайлы жағдай туғызады. Ол үшін қаржы секторы капиталды қайта бөлудің негізгі рөлін тиімді орындауы керек. Банктік қызметтерді цифрландыру үрдісін жалғастыру және несиелеу саласында инновациялық технологияларды енгізу маңызды. Біз банктер өздерінің негізгі қызметтеріне назар аударып, қарыз алушыларға ыңғайлы шарттарды ұсына отырып, бизнеске белсенді қолдау көрсетеді деп күтеміз. Қаржы ресурстарын қайта бөлудің, банктік емес секторды дамытудың және экономиканы қаржыландырудың баламалы көздерінің тиімді арнасы ретінде қор нарығын құру маңызды. Мемлекет өз тарапынан нақты секторды несиелендірудің өсімін дамыту үшін қажетті жағдай жасап жатыр», - делінген Ұлттық банк басшысының баяндамасында.

Ол Мемлекет басшысының тапсырмасы бойынша қаржы секторымен бірге бірқатар маңызды заңнамалық бастама жүзеге асырылып жатқанын атап өтті.

«Қолайлы нормативтік-құқықтық ортаны құруға, ұлттық және қаржылық инфрақұрылымды дамытуға және қаржылық технологияларды қолдауға ерекше назар аударылатын болады. Біз сондай-ақ қаржы нарығында жасанды интеллектінің дамуын реттеу мен ынталандырудың оңтайлы стратегиясын әзірлеу бойынша белсенді жұмыс істейтін боламыз. Қаржы ресурстарының қолжетімділігін қамтамасыз ету арқылы экономикалық өсу мен елдің тұрақты дамуы – біздің ортақ міндетіміз», – деп есептейді Тимур Сүлейменов.