Тимур Сүлейменов: Үкіметтің тариф реформасын уақытша шегергені орынды шешім болды

АСТАНА. KAZINFORM – Ұлттық банк төрағасы Тимур Сүлейменов Үкіметтің коммуналдық тарифтерді көтеру шарасын кейінге қалдыру туралы шешімін уақтылы әрі орынды қадам деп бағалайтынын айтты.

Айтуынша, бұл шешім елдегі бағаны тұрақтандырып, инфляцияға түсетін қысымды бәсеңдетеді.

– Реформа басталған кезде өршіл қарқын меже етіп алынған болатын. Енді соны қайта қарау керек болып тұр. Біз Үкімет солай істегеніне қуаныштымыз. Тарифтің қарқынды өспегені инфляцияның ахуалына әсер етеді, - деді Тимур Сүлейменов.

Сондай-ақ, ол тариф реформасы басталған кезде салық саясаты қалай өзгеретіні айқын болмағанын айтады. Оған сыртқы экономиканың ахуалы, сауда режимдерінің құбылуы қосылған.

- Бизнес жылудың немесе электр қуатының ақысының өскенін көргенде өзі көрсететін қызмет пен өндіретін тауарға да баға қосады. Сондықтан тарифті біртіндеп, бақылай отырып көтерген маңызды, - деді Ұлттық банк басшысы.

Еске салайық, бүгін Ұлттық банк базалық мөлшерлемені тағы өзгеріссіз қалдырды.