Токиода дзюдодан әлемдік Grand Slam жарысы басталды. Жарыстың алғашқы күнінде ерлер 73, 81, 90 келіге дейінгі салмақтарда, әйелдер 57, 78 келіге дейінгі және 78 келіден жоғары салмақ дәрежелерінде өзара мықтыны анықтайды, деп хабарлайды Kazіnform.
Бұл дода биылғы маусымның соңғы бәсекесі болмақ. Оған 88 елден 527 дзюдошы қатысады деп жоспарланған.
Алғашқы жарыс күнінде ерлерде Данияр Шамшаев, Асқар Нарқұлов (73 келі), Абылайхан Жұбаназар, Руслан Мусаев (81 келі), Айдар Арапов, Ермахан Әнуарбеков (90 келі) татамиге шығады.
Ал қыздарда Назгүл Маратова, Камила Берліқаш (78 келіден жоғары) сайысқа түседі.
Айта кетсек, бұдан бұрын Астанада дзюдодан ерлер мен әйелдер арасында Қазақстан чемпионаты аяқталды. Жарыстың соңғы күнінде аралас командалық сайыстан Қызылорда облысы үздік атанды.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.