АСТАНА. ҚазАқпарат - Жапония астанасы Токиода өтіп жатқан халықаралық турнирдің алғашқы айналымында қазақстандық Зарина Дияс жапониялық Мисаки Доимен күш сынасып, жеңіске жетті, деп хабарлайды «ҚазАқпарат» тілшісі.
Myscore.ru сайтынан тікелей көрсетілімде мәлім болғанындай, әлемнің 100-інші ракеткасы Зарина Дияс дүниежүзілік рейтингте өзінен бес саты жоғары тұрған қарсыласына бірінші партияда 3:6 есебімен есе жібергенімен, екіншісінде (6:1) айқын басымдылық көрсетті. Үшінші, шешуші партияда бірден брейк жасап, 2:0 есебімен алға кетті. Бұдан кейін жапониялық теннисші өз геймін алғанымен, З.Дияс тағы бір брейк жасап, есепті 4:1-ге, сосын өзі доп бергенде, есесін жібермей, 5:1-ге жеткізді. Сосын тағы бір брейк жасаған қазақстандық теннисші бұл партияны да 6:1 есебімен аяқтады.
Турнирге іріктеу сайыстары арқылы қосылған Зарина осылайша жеңісті жолын жалғастыруда. Енді ол әлемнің 28-інші, осы турнирдің 2-інші ракеткасы, қытайлық Чжан Шуаймен кортқа шығады.
Айта кетейік, Токио турнирінің жүлде қоры 226 750 АҚШ долларын құрайды.
Бұл турнирге тағы бір қазақстандық, әлемнің 52-інші ракеткасы Юлия Путинцева да қатысуда.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).