АММАН. ҚазАқпарат – Иорданияның Амман қаласында өтіп жатқан бокстан Олимпиадаға іріктеу турнирінде Бекзат Нұрдәулетов қазақ боксшылары арасынан алғашқы «алтынды» жеңіп алды, деп хабарлайды ҚазАқпарат тілшісі.
81 келі салмақта ел намысын қорғаған отандасымыз Бекзат Азия-Тынық мұхиты аймағынан Олимпиадаға іріктеу турнирінің чемпионы атанды.
Ол финалда австралиялық боксшы Пауло Аокусомен қолғап түйістірді. Үш раунд қорытындысы бойынша төрешілер қазақ боксшысын бірауыздан жеңімпаз деп тапты. Есеп - 5:0.
Осылайша, Бекзат қазақстандық боксшылар арасынан олимпиадалық іріктеу турнирінде бірінші болып топ жарды.
Бұған дейін финалға шыққан екі боксшымыз - Зәкір Сафиуллин мен Әбілхан Аманқұл «күмісті» қанағат тұтқан еді.
Аздаған уақыттан соң рингке Василий Левит шығып, алтын медаль үшін таласатын болады.
Күнсұлтан Отарбай
Еуразия Ұлттық университетінің түлегі. Республикалық «Қазақ спорты», «Sport» газеттерінде қызмет атқарған.
2014 жылғы Сочи, 2016 жылғы Рио-Де Жанейро, 2017 жылғы Инчхон және 2024 жылғы Париж Олимпиадасында, сонымен қатар бір қанша Қысқы және Жазғы Азия ойындарынан, әлем біріншіліктеріне барып тікелей хабар таратқан журналист.
Сейдақмет Бердіқұлов атындағы арнайы сыйлықтың лауреаты.