Трамп Иранды ядролық қарудан бас тарту бойынша келіссөзге шақырды

АСТАНА. KAZINFORM – Президент Дональд Трамп Иранның жоғарғы көшбасшысы аятолла Әли Хаменеиге ядролық келісімге байланысты хат жолдағанын хабарлады, деп жазды ABC News.

- Мәселені шешудің екі жолы бар: әскери немесе келісім жасасу. Мен келісім жасасқанды жөн көрер едім, - деді Дональд Трамп.

Сондай-ақ Трамп келісімге қол жеткізілмесе, әскери шара қолданамыз деп қорқытты.

- Уақыт жақындап қалды. Қалай болғанда да бірдеңе болады. Мен оларға хат жаздым, сіз келіссөз жүргізесіз деп үміттенемін дедім, өйткені егер біз өзара әскери әрекетке баратын болсақ, бұл олар үшін жаман болады деп жаздым, - деді Дональд Трамп.

Алайда Иран Ислам Республикасының БҰҰ жанындағы тұрақты өкілдігі Трамптан хат алмағанын мәлімдеді.

Ақ үй басшысы Иран басшылығына ультиматум қоймағанын хабарлады.

Бұл ретте ол: «Біз бірдеңе істеуіміз керек, өйткені біз олардың ядролық қаруға ие болуына жол бере алмаймыз», - деп ескертті.

2019 жылдың басында АҚШ президенті Жапонияның бұрынғы премьер-министрі Синдзо Абэ арқылы осындай хабарлама жіберген болатын, бірақ Иран басшысы келіссөздер туралы ұсынысты ашық түрде қабылдамады.

Ол кезде Хаменеи: «Мен Трампты қандай да бір хабарлама алмасу керек адам деп санамаймын» деп мәлімдеген.

Трамп президенттігіндегі бірінші мерзімде АҚШ-ты Иран мен Обама әкімшілігі арасындағы келісімнен алып тастағанын еске салған жөн. 2015 жылғы ядролық келісім Иранға уранды тек 3,67% тазалық деңгейіне дейін байытып, оның 300 келі қорын 300 кг көлемінде сақтауға мүмкіндік берді.

Өткен айда Трамп Иранға «максималды қысым» көрсету, соның ішінде Тегеранның ядролық қаруға ие болу мүмкіндігінен айыру үшін оның мұнай экспортын қысқартуға бағытталған меморандумға қол қойды.

Осыған дейін Иран Сыртқы істер министрлігі АҚШ-тың мұнай өнеркәсібіне қарсы жаңа санкциялары негізсіз және халықаралық стандарттарға қайшы деп санайтыны туралы жаздық.