Трамп TikTok келісіміндегі миллиардерлердің есімін жариялады

АСТАНА.KAZINFORM — АҚШ президенті Дональд Трамп Fox News арнасына берген сұхбатында әлемнің ең бай адамдарының бірі АҚШ-та TikTok-ты сақтап қалу келісіміне қатысуы мүмкін екенін айтты, деп хабарлайды CNBS. 

Трамп келісімге Oracle төрағасы Ларри Эллисон мен Dell Technologies бас директоры Майкл Делл қатысуы мүмкін екенін атап өтті.

— Бұл командада Лахлан Мердок пен Руперт те болуы мүмкін. Менің ойымша, екеуі де қатысады. Тағы бірнеше адам бар өте ықпалды адамдар. Олар америкалық патриоттар, өздеріңіз білесіздер, олар өз елін жақсы көреді. Менің ойымша, олар тамаша жұмыс істейді, — деді Трамп.

Руперт Мердок — медиамагнат, News Corporation және 21st Century Fox медиахолдингтерінің негізін қалаушы және Wall Street Journal басылымының иесі.

Лахлан Мердок — Руперт Мердоктың ұлы.

Жағдайға жақын CNBC дереккөзінің айтуынша, Лахлан Мердоктың келісімге қатысуы екіталай, бірақ ол атқарушы төрағасы және бас директоры қызметін атқаратын Fox Corporation рөл атқара алады.

Трамп мәлімдемелері қытайлық ByteDance компаниясына тиесілі TikTok-қа Америка Құрама Штаттарында жұмысын жалғастыруға мүмкіндік беретін келісім бойынша жалғасып жатқан келіссөздер кезінде жасалды.

Сенбіде Ақ үй ықтимал мәміленің жаңа мәліметтерін жариялады: TikTok-ты бақылайтын директорлар кеңесінің жеті мүшесінің алтауы АҚШ азаматтары болады. Сонымен қатар, Ақ үйдің баспасөз хатшысы Кэролайн Левиттің айтуынша, TikTok алгоритмін бақылау АҚШ тарапына беріледі, бұл келіссөздердің басты нүктесі.

Левитт сондай-ақ Oracle АҚШ-та деректерді сақтау және пайдаланушының құпиялылығына жауап беретінін түсіндірді.

Бұған дейін Трамп пен Қытай төрағасы Си Цзиньпин жұма күні телефон арқылы сөйлескен кезде бұл келісімді талқылаған болатын. Қоңыраудан кейін Трамп келісімнің аяқталуға жақын екенін мәлімдеді.