Трамптың Азияға сапары басталды

АСТАНА. KAZINFORM — Дүйсенбі күні АҚШ президенті Дональд Трамп Азияға бірнеше күнге созылатын сапарына аттанды. Сапар аясында ол АТЭС саммиті кезінде Ресей президенті Владимир Путинмен және Қытай төрағасы Си Цзиньпинмен кездесуді жоспарлап отыр, деп хабарлайды Kazinform агенттігінің Вашингтондағы меншікті тілшісі CBS News -ке сілтеме жасап.

Фото: видеодан алынған скрин

Трамп бұл жолғы сапарын ауқымды сапар деп атап, Қытайда Солтүстік Корея басшысы Ким Чен Ынмен кездесуі мүмкін екенін айтты.

Трамп, Си Цзиньпин және Владимир Путиннің кездесуі ядролық қаруды таратпау мәселесіне арналмақ. Сондай-ақ Иран мен Украинадағы қақтығысқа баса назар аударылады.

Алдымен АҚШ президенті Филиппинге барады. Онда Оңтүстік-Шығыс Азия мемлекеттері қауымдастығының жыл сайынғы саммиті өтіп жатыр.

Бұдан кейін Трамп Жапония, Үндістан және Аустралия өкілдерімен Үнді-Тынық мұхиты аймағындағы қауіпсіздік мәселелерін талқылайды. Сондай-ақ Таиландпен сауда келісіміне қол қойып, Оңтүстік-Шығыс Азия елдерінің басшыларымен және аймақтың өзге де жетекшілерімен өтетін кешкі асқа қатысуды жоспарлап отыр.

Сәрсенбі күні АҚШ президенті Филиппин президенті Фердинанд Маркоспен президент сарайында түскі ас өткізбекші. Одан кейін Қытайдың Шэньчжэнь қаласына аттанады. Онда АТЭС саммиті аясында Азия-Тынық мұхиты экономикалық ынтымақтастығы ұйымына мүше елдердің басшыларымен кездеседі. Ал бейсенбі күні Владимир Путин және Си Цзиньпинмен жүздеседі.

Сондай-ақ бұл сапарда АҚШ президентіне Tesla және SpaceX компанияларының бас директоры Илон Маск еріп баратыны хабарланды. Алайда ол Путин және Си Цзиньпинмен өтетін кездесуге қатыспайды.

Айта кетейік, бұған дейін Қытай Сыртқы істер министрлігі Си Цзиньпиннің Владимир Путин және Дональд Трамппен кездесетінін растаған болатын.