Тұран жолбарысын жерсіндіру: Келер жылы Ресейден Балқашқа 3-4 жолбарыс әкелінеді

АСТАНА. KAZINFORM – Экология және табиғи ресурстар министрі Ерлан Нысанбаев Тұран жолбарысы популяциясын қалпына келтіру жұмыстары жөнінде айтып берді. Осылайша Қазақстан аумағында 70 жылдан кейін алғашқы жабайы жолбарыстар пайда болмақ.

Министрдің айтуынша, биыл Тұран жолбарысы мен Пржевальский жылқысын тарихи мекенінде жерсіндіру бойынша екі үлкен жоба белсенді жүзеге асуда.

Жолбарыстарды тарихи мекеніне қайта жерсіндіру бағдарламасы аясында Алматы облысында Іле-Балқаш мемлекеттік табиғи резерваты құрылды.

− Жолбарыстың табиғи азық қорын қайта қалпына келтіру үшін 2018-2024 жылдары резерват аумағына 205 тоғай бұғысы әкелінді, 100-ден астам құлан көшірілді, еліктер мен қабандар популяциясы көбейтілді. Биыл күзде Іле-Балқаш резерватында арнайы торлы қоршауда өсіру үшін Нидерландыдан 2 жолбарыс әкелінді, - деді министр Үкімет үйінде өткен баспасөз мәслихатында.

Сондай-ақ, 2025 жылы Ресей Федерациясынан 3-4 жолбарыс алып келу күтілуде.

− Әкелінген жолбарыстардың тұқымдары Қазақстан аумағында 70 жылдан кейін қайта пайда болған алғашқы жабайы жолбарыстар болады деп үміттенеміз, - деді Е. Нысанбаев.

Еске сала кетсек, Богдана және Кума есімді қос жолбарыстың елге келуі Дүниежүзілік жабайы табиғат қоры (WWF) мен БҰҰ-ның Даму бағдарламасы аясында жүзеге асқан. Көшіру процесі Орман шаруашылығы және жануарлар дүниесі комитеті мен Нидерланды орталығы арасындағы меморандумға қол қоюдан басталып, жолбарыстардың тұқымын көбейту үшін ақысыз негізде әкелінген.