Түрік инвесторлары Ақтөбеде көлік-логистика орталығын салады

АҚТӨБЕ. ҚазАқпарат – Ақтөбеде түрік инвесторларының қаржысына көлік-логистика орталығы салынады, деп хабарлайды ҚазАқпарат тілшісі.

Ақтөбе облысының әкімі Оңдасын Оразалин құны 50 млн АҚШ доллары тұратын көлік-логистика орталығын салатын «S Sistem» түрік компаниясының президенті Хусейн Барлинді қабылдады. Компания салатын орталықта әуе хабы болады.

«Транзиттік хаб ретінде Ақтөбе облысының келешегі зор. Біз өз тарапымыздан жобаға тиісті қолдауды көрсетеміз»,- деді облыс әкімі Оңдасын Оразалин.

Өз кезегінде Хусейн Барлин өңірдің көлік-логистикалық инфрақұрылымын инвестициялауда қызығушылығы жоғары екенін ​ атап өтті.

«Логистикалық хаб Қазақстан мен көршілес елдер арасындағы тауар мен жүк айналымын арттыруға мүмкіндік туғызады. Ақтөбе өңірін дамытуға оң әсерін тигізетініне сенімдімін»,- деді Хусейн Барлин.

Кездесу барысында тараптар инвестициялық жобаларды жүзеге асыру бойынша өзара ынтымақтастық туралы меморандумға қол қойды.