Түркістан облысында тұрғын үйден 2 снаряд табылды
Түркістан облысының полицейлері «Қару» жедел-профилактикалық іс-шарасы барысында заңсыз айналымнан 2 снаряд, 8 атыс қаруын тәркіледі. Оның ішінде 2 шолақ мылтық, 5 тегіс ұңғылы қару және 1 травматикалық тапанша бар.
Мәселен, Келес ауданында жергілікті тұрғынның ауласынан снарядқа ұқсас зат табылды. Белгілі болғандай, ауыл тұрғыны үйіне көрші ауданнан металл алып келген. Оны сұрыптау кезінде екі снарядты байқап, полицейлерді шақырқан.
«Аталған жайт Келес аудандық полиция бөлімінде тіркелді. Оқиға орнына жедел-тергеу тобы мен әскери бөлімнің қызметкерлері жетті. Полиция тәркіленген қауіпті құрылғыны жою үшін саперларға тапсырды», - делінген Түркістан облысы Полиция департаментінің баспасөз қызметі таратқан хабарламада.
Ал Жетісай ауданындағы профилактикалық жұмыстар барысында полиция қызметкерлері жас жігіттен тіркелмеген «ОСА» маркалы травматикалық тапаншаны 4 патронымен тәркілеген.
Бүгінде тәртіп сақшылары сотқа дейінгі тергеу амалдарын жүргізіп, барлық мән-жайды анықтауда.
Сонымен қатар, «Қару» жедел-профилактикалық іс-шарасы барысында тәртіп сақшылары 700-ден астам қару иелерін тексеріп, 69 әкімшілік құқық бұзушылықты анықтады. Оның ішінде, ҚР Әкімшілік құқық бұзушылық туралы кодексінің 482-бабы «Жеке және заңды тұлғалардың қаруды заңсыз иеленуі, беруі, өткізуі, сақтауы, алып жүруі, тасымалдауы» бойынша 5 әкімшілік хаттама толтырылған.
ҚР ӘҚБтК-нің 484-бабымен «Азаматтық, қызметтік, марапаттық, коллекциялық қаруды, оның патрондарын сатып алу, беру, есепке алу, сақтау, пайдалану, тасымалдау, Қазақстан Республикасының аумағына әкелу, Қазақстан Республикасының аумағынан әкету және Қазақстан Республикасының аумағы арқылы транзитпен өткізу тәртібін бұзу» - 27 және ҚР ӘҚБтК-нің 486-бабы бойынша «Азаматтық, қызметтік, коллекциялық қаруды тіркеу (қайта тіркеу) не оны есепке қою тәртібін бұзу» бойынша 42 тәртіп бұзушыны жауапқа тартылды.