Түркістан облысында жергілікті маңызы бар автомобиль жолдары жоспарға сай жөнделуде
Жолға жауапты мамандардың айтуынша, жыл соңында 526 нысан немесе 1 015,9 шақырым жол пайдалануға берілетін болады. Облыс әкімі Өмірзақ Шөкеевтің тапсырмасына орай, негізгі басымдық облыс аумағындағы халқы тығыз әрі шекара маңында орналасқан оңтүстік аудандары автомобиль жолдарының жағдайын жақсарту мәселесіне берілуде. Бұл Шардара, Мақтаарал, Жетісай, Келес және Сарыағаш аудандары болып отыр. Қазіргі таңда «Түркістан-Шардара» бағытындағы облыстық маңызы бар КХ-8 «Өзбекстан шекарасы-Шардара-Арыс-Темірлан» автомобиль жолының жалпы 162,6 шақырымында және жол бойындағы 8 көпірде жөндеу жұмыстары жүргізіліп жатыр. Пайдалануға берілген кезде облыс орталығы мен оңтүстік аудандар арасындағы арақашықтық 120 шақырымға дейін қысқаратын болады. Осы аралықтағы жолдың 145 шақырымы ағымдағы жылы толық аяқталады деп жоспарлануда.