ТҮРКІСТАН. ҚазАқпарат - Түркістан облысындағы жол саласында сыбайлас жемқорлық фактілері өскен. Бұл туралы ҚР Сыбайлас жемқорлыққа қарсы іс-қимыл агенттігінің Түркістан облысы бойынша департамент басшысының бірінші орынбасары Нұрдәулет Сәмет Түркістан өңірлік коммуникациялар қызметінде өткен брифингте айтты, деп хабарлайды ҚазАқпарат тілшісі.
Нұрдәулет Сәмет айтуынша, 2021 жылы антикор өндірісінде 18 сотқа дейінгі тергеу болса, биылғы жылдың бірінші жартыжылдығында 15 жемқорлық қылмысы тіркелген. Олардың көпшілігі жымқыру, билікті теріс пайдалану, парақорлық және қызметтік жалғандықпен байланысты.
«Автожол проблемаларының өзектілігін ескере отырып, Агенттік «Әділдік жолы» республикалық қоғамдық бірлестігімен бірлесіп барлық өңірлерде қоғамдық мониторингті басталғалы отыр. «Әділдікті талап ет!» ұранымен өтетін республикалық акцияның негізгі мақсаты – автомобиль жолдарын салу, жөндеу және күтіп ұстау саласындағы жүйелі құқық бұзушылықтарды жою. Бұл бағытта маңызды шешімдер қабылданатын болады» - деді Сәмет Нұрдәулет.
Қайрат Зайнишев
Шымкенттегі М.Сапарбаев атындағы ОҚГИ түлегі. Еңбек жолын «Ақиқат-Истина» газетінде тілші болып бастады. Кейіннен «Шымкент келбеті», «Оңтүстік Қазақстан» газеті мен «Ernur.kz» сайтында тілші, «Кентау шұғыласы» газетінің бас редакторы қызметтерін атқарды. Республикалық «Экспресс К» сайтының Түркістан облысындағы тілшісі болды. 2021 жылдан бастап «Kazinform» агенттігінің Түркістан облысындағы тілшісі қызметін атқаруда.