Бүгін қалада ҚР Қаржы министрлігіне қарасты аумақтық органдар өкілдігінің ашылу салтанатына Түркістан облысының әкімі Ж.Түймебаев, ҚР Қаржы министрлігінің жауапты хатшысы Б.Тортаев, Түркістан облысы бойынша мемлекеттік кірістер департаментінің басшысы Ә.Тілегенов пен қала әкімі Ә.Өсербаев қатысты.
Салтанатты жиналыста өңір басшысы Елбасы Жарлығымен облыс орталығын Түркістан қаласына көшіру жұмыстары жоспарға сай жүргізіліп жатқанын тілге тиек етті. Сондай-ақ, Қазақстан Республикасының Қаржы министрлігінің облыстық органдарының Түркістан қаласында өкілдіктерінің ашылуы берілген тапсырманы орындаудың алғы шарттары екендігін атап өтті.
Заманауи құрылғылар арқылы көрсетілетін сапалы қызмет - бюджеттің салық түсімін көбейтуге септігін тигізері анық. Мұнда жалпы 48 түрлі қызмет көрсетілсе, оның 40-ы электронды түрде. Мамандар «Бір терезе» қағидасы арқылы халыққа жылдам әрі сапалы қызмет етпек.
Жалпы облыс бойынша бүгінгі күнге дейін аталған мекеме арқылы халыққа 1 млн 48 мың қызмет көрсетілсе, оның 941-і электронды түрде болған.
Сонымен қатар, ҚР Қаржы министрлігінің жауапты хатшысы Б.Тортаев, Түркістан облысының құрылуымен құттықтай келе, Қазақстан Республикасының Қаржы министрлігінің облыстық органдарының өкілділігін жаңа облыс орталығында ашудың негізгі мақсаты - мемлекеттік органдарды ғимараттармен қамтамасыз ету, орналастыру және көшіп келетін қызметкерлерге әлеуметтік жағдай жасауды үйлестіру жұмыстарын жүргізу екендігіне тоқталды.
Салтанатты рәсімнен соң қатысушылар ғимаратта орналасқан өкілдіктердің жағдайымен танысты.
Еске сала кетейік, жалпы Түркістан облысы бойынша Шымкент қаласында орналасқан 30 аумақтық мемлекеттік орган бар болса, келесі айдың ішінде олардың барлығы осында Түркістан қаласына көшпек. Ал әкімдікке қарасты облыстық 24 басқарма да келесі айда толығымен көшіп, жаңа облыс орталығында өз жұмыстарын бастамақ.