ОРАЛ. ҚазАқпарат - Футболдан премьер-лига командалары арасында ел біріншілігіне дайындық барысында «Ақжайық» екінші оқу-жаттығу жиынына кірісті, деп хабарлайды «ҚазАқпарат» тілшісі.
«Ақжайық» футбол клубының баспасөз қызметінен түскен мәліметке қарағанда, украиналық маман Владимир Мазяр жаттықтыратын оралдықтар бұл әзірлік кезеңін Түркияның Анталья қаласында 4 ақпан - 1 наурыз аралығында өткізеді.
Батысқазақстандықтар алғашқы жолдастық кездесуінде 7 ақпан күні Венгрия ІІ Ұлттық лигасында ойнайтын «Дьёри ЭТО» командасымен алаңға шығады. Содан кейін 9 ақпан күні «Черноморец» (Одесса) клубымен шеберлік байқасады.
Жиын барысында команда құрамы нақтыланады.
Айта кетейік, бұған дейін «Ақжайықтың» капитаны Мейрам Сапанов және Азат Ерсәлімовпен еңбек шарты ұзартылса, командаға жаңадан Еркебұлан Нұрғалиев, Берік Шаихов, Украина елінің өкілдері Андрей Ткачук, Адеринсола Эсеола, Сергей Басов алынған болатын.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).