Түркиялықтар үйлену тойының шығынын үнемдеуге көшті

АСТАНА. KAZINFORM – Соңғы уақытта Түркияда үйлену тойларының шығыны айтарлықтай өсіп кеткен еді, соңғы кездері жастар бұл мерекені өткізудің бюджеттік және ықшам нұсқаларына қызығушылық танытуда, деп хабарлайды Kazinform меншікті тілшісі.

Елде танымал бола бастаған осындай нұсқалардың бірі – екі сағатқа созылатын «үнемді үйлену тойы». 

Түркияда үйлену тойын ұйымдастырушылар адамдарға бұл форматты күні бойы созылатын және үлкен қаржыны қажет ететін дәстүрлі салтанатты мерекелерге балама ретінде ұсынып отыр. 

Үйлену тойы шығынын үнемдеп өткізу - бұл қысқа да стильді шара, онда ерлі-зайыптылар символдық рәсімді, шағын банкет өткізіп, өмірінің маңызды сәтін жақын достары мен туыстарының ортасында мерекелеп, сонымен бірге шығындарды айтарлықтай азайтады.

Үйлену тойының мұндай форматына дәстүрлі салтанаттың сақина алмасу, алғашқы би және фотосессия сияқты негізгі элементтері кіреді. Алайда үлкен банкет залдары мен сәнді әшекейлердің орнына үйлену тойында жайлы да керемет орындарға назар аударылады, бұл шараны қолжетімді етеді. 

Жаңа тренд өміріндегі маңызды күнді қарызға батпай немесе тым көп шығынсыз өткізгісі келетін жас жұбайларды қызықтырып отыр. «Үнемдеп үйлену тойын жасау» - жастар мен олардың қонақтарына жеке-жеке әңгімелесуге, жақынырақ танысуға мүмкіндік береді.

Бұған дейін Түркияда жасы 50-ден асқан адамдар арасында ажырасу жағдайлары көбейгенін жазған болатынбыз.