Түркістан облысы бойынша мемлекеттік кірістер департаментінің басқарма басшысы Сәуле Шырынбекованың айтуынша, жыл басынан бері кедендік бақылау нәтижесінде жалпы салмағы 131,9 грамм болатын есірткі заттарын заңсыз алып өтудің 27 фактісі тіркелген.
– Сонымен қатар мұнай өнімдерін заңсыз әкетудің 77 дерегі анықталып, сот шешімімен 2,29 млн теңгеден астам айыппұл салынды. Жалпы 9,5 тонна бензин мен 8,1 тонна дизель отыны тәркіленді, – деді спикер.
Бұдан бөлек жалпы сомасы 64,3 мың АҚШ долларын құрайтын валютаны заңсыз әкетудің үш фактісі анықталды. Сондай-ақ рейдтік іс-шаралар барысында салық заңнамасын бұзудың 667 дерегі тіркелген.
– Оның ішінде 386 жағдайда бақылау-касса машинасы қолданылмаған, 151 азамат жеке кәсіпкер ретінде тіркелмей кәсіпкерлік қызметпен айналысқан. Сондай-ақ 11 жағдайда POS-терминал пайдаланылмаған, ал 119 кәсіпкердің лицензиясыз алкоголь өнімдерін сатқаны анықталды, – деді Сәуле Шырынбекова.
Бұған дейін Түркістан облысындағы «Қапланбек» өткізу бекетінде жанжал туып, полиция іс қозғағанын жазған едік.