Қазығұрт ауданының Тұрбат ауылында тұратын жас отбасының шаңырағында бірден үш ұл дүниеге келді.
Үшемнің әкесі Аслиддин Шапахов 1998 жылы, ал анасы Зиеда Сайдурасил 2003 жылы туған. Жас отбасының тұңғышы – Турсунмурод. Енді олардың отбасына Хасан, Хусан және Усмон есімді үш ұл қосылып, ерлі-зайыпты төрт баланың ата-анасы атанды.
Облыстық денсаулық сақтау басқармасының мәліметінше, босандыру отасы жүктіліктің 33 аптасы 4 күнінде жасалған. Ота сәтті өтіп, ана мен сәбилердің жағдайы тұрақтанғаннан кейін олар үйіне шығарылды.
– Түркістан облыстық №1 перинаталдық орталығының дәрігерлері босандыру кезінде қажетті медициналық көмек көрсетті. Қазіргі уақытта жас ана мен үшемнің жағдайы бақылауда, тиісті оңалту шаралары жүргізіледі, – делінген хабарламада.
Бұған дейін Түркістан облысында жыл басынан бері жетінші үшем дүниеге келгенін хабарлаған едік. Сәбилерге Сұлтан, Омар және Осман есімдері берілген.