Түркістан облысында көкпаршы жігіттер дауыс беруге келді
ТҮРКІСТАН. KAZINFORM — Созақ ауданына қарасты Жартытөбе ауылындағы № 695 референдум учаскесінде ауыл жастары дауыс беруге атпен келді.
Ұлттық дәстүрді дәріптеген жастар учаскеге салт атпен келіп, өз таңдауларын жасады. Олар ел болашағына бейжай қарамайтындықтарын танытты.
Бұл бастама ауыл тұрғындарының назарын аударып, дауыс беру күніне ерекше көрік берді. Жастардың ұлттық нақыштағы әрекеті көпшілікке көтеріңкі көңіл күй сыйлап, мерекелік атмосфера қалыптастырды.
Ауыл жастарының айтуынша, мұндай бастама ұлттық құндылықтарды насихаттаумен қатар, жастардың қоғамдық-саяси науқандарға белсенді қатысуына ықпал етеді.
— Бүгін біз еліміздің болашағы үшін өз таңдауымызды жасадық. Әр азаматтың дауысы маңызды, пікірі құнды деп санаймыз. Баршаңызды дауыс беруге шақырамыз, — деді көкпаршы Мәди Сейдуллаев.
Айта кетейік, аталған учаскеде тұрғындар референдумға белсенді қатысып, азаматтық ұстанымдарын білдіріп жатыр.
Бұдан бұрын Түркістан облысында 37 мыңнан астам жас алғаш рет дауыс беретінін жазған едік.