Түркістан облыстық аумақтық референдум комиссиясының мәліметінше, республикалық референдумға қатысу үшін мүгедектігі бар адамдар үшін қолайлы жағдай жасалған.
— Облыста дауыс беру құқығына ие мүгедектігі бар адамдардың саны — 16 601. Оның ішінде 4 мың адам кресло-арбаларды пайдаланады. Зағип және нашар көретіндер — 8171, ал есту қабілеті төмен жандар — 4430. Өңірдегі барлық 948 референдум учаскесі толығымен «Қолжетімді орта» интерактивті қолжетімділік картасына енгізілген, — деп хабарлады облыстық аумақтық референдум комиссиясы.
Жалпы өңірде ерекше қажеттіліктері бар азаматтар үшін кедергісіз орта қалыптастыру бағытында қажетті шаралар қабылданған.
— Барлық учаскелерде тірек-қимыл аппараты функциялары бұзылған азаматтардың, оның ішінде кресло-арбаларды пайдаланушылардың қолжетімділігі ескеріліп, жасырын дауыс беруге арналған кабиналар және мүгедектігі бар адамдарға арналған арнайы бұрыштар қарастырылған, — делінген хабарламада.
Сондай-ақ облыста референдум учаскелерінде қоғамдық бірлестіктердің қатысуымен мүгедектігі бар азаматтарға жасалған жағдайларға мониторинг жүргізіліп жатыр.
Бұдан бұрын Түркістан облысында 1,2 млн-ға жуық азамат референдумда дауыс бере алатынын жазған едік.