Түркістанда бірқатар нысанның құрылысы іске асады – министрлік

АСТАНА. KAZINFORM – Бүгін Сенаттың жалпы отырысында Ұлттық экономика вице-министрі Арман Қасенов биыл Түркістан қаласында салынатын нысандар туралы айтып берді.

Бүгін Сенаттың жалпы отырысында «Түркістан қаласының ерекше мәртебесі туралы» заңы мен ілеспе құжат мақұлданды.

Оның сөзіне қарағанда, бұл заң қабылданбай тұрғанның өзінде Түркістанды дамытуға ерекше көңіл бөлінді. 2018 жылы республикалық бюджеттен бөлінген нысаналы трансферттер 13 млрд теңге, 2024 жылы 72 млрд теңге болды, яғни 6 жылда қаланы қаржыландыру 5,5 есеге өсті.

- Бұл өз кезегінде оң әсер етті. Өйткені, қаланың жалпы өңірлік өнімі 6 есе, өнім шығару 10 есе, қаланың жеке кірісі 14 есе өсті, - деді Арман Қасенов.

Оның айтуынша, 2025 жылы мына жобалардың құрылысы іске асады:

— «Парасат» және «Астана» саябақтарының құрылысы және реконструкциясы. Бұл мақсатқа 10 млрд теңге бөлінді;

— «Түркістан» арнайы экономикалық аймағында инженерлік инфрақұрылымды салу. Бұл жұмысқа бастапқыда 7 млрд теңге жоспарланған;

— 3 млрд теңгеге олимпиадалық резервтегі жасөспірімдер спорт мектебі үшін спорт кешенінің құрылысы;

— құны 4 млрд теңгеге спорт кешендері бар ескек есу каналының құрылысы;

— ипподромы бар көп функционалды кешен, 13 млрд теңге қарастырылған.

Бұдан бұрын хабарланғандай, Туризм және спорт вице-министрі Ержан Еркінбаев Түркістан қаласының туризмін дамытудың бөлек кешенді жоспары даярланатынын айтты.