Түркістанда цифрлық технологиялар тиімділікті арттырып жатыр

ТҮРКІСТАН. KAZINFORM — Түркістан қаласында енгізіліп жатқан цифрлық жобалар тұрғындар үшін ыңғайлы әрі қолжетімді мемлекеттік қызмет көрсетуді қамтамасыз етіп отыр.

Мемлекет басшысы Қасым-Жомарт Тоқаев өз Жолдауларында цифрландырудың маңыздылығын үнемі атап өтіп келеді. Президенттің айтуынша, цифрлық шешімдер мемлекеттік басқарудың тиімділігін арттырып қана қоймай, қоғамда ашықтық пен есептілікті қамтамасыз етеді. «Цифрлық Қазақстан» мемлекеттік бағдарламасының басты мақсаты — халыққа қызмет көрсетуді жеңілдетіп, қолжетімді ету. Бұл бағытта өңірлерде, оның ішінде Түркістан қаласында да бірқатар жүйелі шаралар жүзеге асырылып жатыр.

Бүгінгі таңда Түркістан қаласы әкімдігіне қарасты бөлімдер қызметінде заманауи цифрлық жобалар кеңінен енгізілуде. Олардың негізгі мақсаты — мемлекеттік қызметтерді тұрғындарға қолжетімді әрі тиімді ету. Мәселен, «Е-otinish» бірыңғай платформасы арқылы азаматтар өтініштерін электронды түрде жолдап, олардың қаралу барысын онлайн қадағалай алады. Бұрын құжат тапсыру үшін бірнеше күн уақыт кетсе, бүгінде бірнеше минутта рәсімдеуге мүмкіндік бар. Бұл өз кезегінде тұрғындардың уақытын үнемдеп қана қоймай, мемлекеттік органдардың ашықтығын күшейтіп отыр.

Сондай-ақ әкімдік бөлімдерінде ішкі құжат айналымы толықтай дерлік электронды форматқа көшірілуде. «Documentolog» жүйесі құжаттарды тіркеу, келісу және қол қоюды онлайн режимде жүзеге асыруға мүмкіндік береді. Бұрын қағазбастылықтан туындайтын уақыт шығыны айтарлықтай азайып, қызметтің жеделдігі артты. Әкімдік қызметкерлері бір құжатты бірнеше мекеме арасында қолма-қол тасымай-ақ, жүйе арқылы жедел бағыттай алады.

Қала аумағын басқаруда геоақпараттық порталдың орны ерекше. Бұл жүйе инфрақұрылым, жер телімдері, құрылыс нысандары және басқа да маңызды мәліметтерді карта арқылы көруге мүмкіндік береді. Мұндай шешім қала құрылысы мен жер қатынастарына байланысты шешімдерді қабылдауды жеңілдетіп, инвесторлар үшін де қолайлы жағдай туғызды. Геоақпараттық жүйе арқылы бос жер учаскелері, инженерлік инфрақұрылымның жағдайы немесе жоспарланған құрылыс аймақтары туралы нақты деректер алуға болады.

Мемлекеттік қызметтердің барынша электронды форматқа көшуі де айтарлықтай нәтижесін беруде. Қала тұрғындары «Электронды үкімет» порталы арқылы күнделікті қажет қызметтердің басым бөлігін онлайн ала алады. Бұл азаматтардың уақытын үнемдеп қана қоймай, қызмет сапасын арттырып отыр. Әсіресе жастар мен цифрлық сауаты жоғары азаматтар үшін бұл жүйенің тиімділігі зор.

Сонымен қатар «Е-qyzmet» платформасы да енгізіліп, мемлекеттік органдар арасындағы ішкі әкімшілік процестерді автоматтандыруға жол ашты. Қызметтік жазбаларды жолдау, бұйрықтар дайындау, өтінімдер беру сияқты жұмыстар енді толықтай электронды түрде жүргізіледі. Мұндай шешім кадрлық іс жүргізуді де айтарлықтай жеңілдетті.

Жалпы алғанда, Түркістан қаласында енгізіліп жатқан цифрлық жобалар тұрғындар үшін ыңғайлы әрі қолжетімді мемлекеттік қызмет көрсетуді қамтамасыз етіп отыр. Бұл бағыттағы жұмыстар алдағы уақытта да жалғасын табатыны сөзсіз. Президент Жолдауларында атап көрсетілгендей, цифрландыру — мемлекеттік басқарудың жаңа деңгейін қалыптастыруға жол ашатын басты құрал. Сондықтан Түркістандағы бастамалар өзге өңірлер үшін де үлгі бола алады.

Айта кетейік, бұдан бұрын Түркістанда электронды қызметке деген сұраныс артып келе жатқанын жазған болатынбыз.