Түркістанда Жерорта теңізінен жеткізілген өсімдіктер өседі
ТҮРКІСТАН. KAZINFORM — Түркістанда ботаникалық бағы бар «Жастар» саябағы ашылды.
Саябақ ішіндегі жабық жылыжайда әртүрлі құрлықтан жеткізілген өсімдіктердің 70-ке жуық түрі өсіріледі. Олардың ішінде Жерорта теңізі, Латын Америкасы, Еуропа, Оңтүстік Шығыс Азия және тағы басқа аймақтардың өсімдіктері бар.
Сондай-ақ, пальма, фикус, тропикалық, шөл, субтропиктік, цитрус өсімдіктерімен қамтылған. Саябақта құстар мен балықтар да бар.
Сонымен қатар, мұнда мектеп оқушыларына биология сабақтарын өту мүмкіндігі қарастырылған.
Саябақтың жалпы алаңы — 10,5 га аумақты алып жатыр. Демалыс аймағында скейтборд алаңдары, шахмат клубы, өзге де ойын алаңдары, бұдан бөлек, 2 шақырым жүгіру жолы және веложолдар орнатылған.
Жаңа саябақтың ашылу салтанатына қатысқан облыс әкімі Дархан Сатыбалды қала тұрғындары мен қонақтарын алда келе жатқан еліміздің Тәуелсіздік күні мерекесімен құттықтады.
— Өздеріңізге мәлім, осыдан 6 жыл бұрын жаңа Түркістан облысы құрылды. Бүгінде Түркістан тек облыс орталығы ретінде ғана емес, түркі әлемінің рухани мәдени орталығы болып қалыптасты. Түрлі нысандар бой көтеріп, шын мәніндегі инфрақұрылымы қалыптасқан жаңа сәулетті қалаға айналды. Қаланы абаттандыру және қала тұрғындары мен қонақтары үшін серуендеуге қолайлы жағдай жасау, сондай-ақ Түркістан қаласында жасыл желектер алқабын ұлғайту мақсатында нақты жұмыстар атқарылуда, — деді облыс әкімі Дархан Сатыбалды.
Іс-шараға елімізге танымал өнер жұлдыздары — Мадина Сәдуақасова, Ғазизхан Шекербеков, Махмуд Уримбаев қатысып, өнер көрсетті.
Бұған дейін хабарлағанымыздай, бүгін Тәуелсіздік күні қарсаңында 500-ден аса түркістандық баспаналы болды.