ӨСКЕМЕН. ҚазАқпарат – Шығыс Қазақстан облысы Алтай ауданында тұрмыстық техника тасымалдап келе жатқан жүк көлігі толықтай жанып кетті, деп хабарлайды ҚазАқпарат тілшісі.
ШҚО Төтенше жағдайлар департаменті баспасөз қызметінің мәліметіне сүйенсек, оқиға 14 желтоқсанда сағат 23.00 шамасында болған.
«Газель» жүк көлігі «Алтай-Катонқарағай» тасжолында, нақты айтқанда Алтай ауданы Средигорное ауылына 3 шақырымдай жерде келе жатқанда кенет өрт шықты.
«Белгілі болғандай, қысқа тұйықталудың салдарынан капот астындағы жанғыш бөлшектер өртенген. Тілсіз жау лезде көлік салонына жайылды. Оқиға орнына өрт сөндірушілер келіп жеткенше көлік пен оған тиелген тұрмыстық техника толықтай жанып кеткен», - делінген ақпаратта.
Абырой болғанда, жүргізуші зардап шеккен жоқ.
Талғатжан Мұхаметбекұлы
Өскемендегі С.Аманжолов атындағы ШҚУ-ды "Журналистика" мамандығы бойынша тәмамдаған. Еңбек жолын 2015 жылы ШҚО "Алдаспан" газетінде тілші болып бастады. ШҚО "Менің өлкем" газетінде тілші, республикалық "Жас қазақ", "Заң" газеттерінде Шығыс Қазақстан облысы бойынша меншікті тілші, ШҚО "Менің өлкем" газетінің бас редакторы қызметтерін атқарған. Kazinform агенттігінде 2021 жылдан бері жұмыс істеп келеді.