Басқосуда тараптар бауырлас қазақ-түрік қарым-қатынасын одан әрі жақсарту жайын талқылап, ынтымақтастық меморандумын түзу жайын әңгімеледі. Атап айтқанда, олар ауыл шаруашылығы, өнеркәсіп, мәдениет, туризм сынды түрлі салалар бойынша бірлескен жобалар жасауға уағдаласты.
Өз кезегінде, аймақ басшысы облысқа арнайы келген мәртебелі мейманға алғысын білдіріп, бірлесе жұмыс істеуге дайын екенін жеткізді.
Агенттік өкілі Әли Ихсан Чаглар өзі қызмет ететін TIKA ұйымы арқылы Қазақстанның Тәуелсіздік жылдарында жеткен табыстарын дүниежүзіне танытып, еліміздің атын шығаруға әрекет ететінін жеткізді.
Айта кету керек, Түркия Республикасы Үкіметі жанындағы Түрік ынтымақтастық және үйлестіру агенттігінің әлемнің 56 елінде филиалдары бар. Жер-жаһанның 150 елімен ынтымақтастық жобаларын жасасқан TIKA ұйымы соңғы 3 жылда ынтымақтастық жұмыстары мен гуманитарлық көмектердің арқасында әлемде алдңғы қатарға шыққан.