ТжКБ мұғалімдеріне арналған ұлттық біліктілік тест әзірленуде
Айта кетсек, бұған дейін Парламент Мәжілісінің депутаттары кәсіптік-техникалық білім беру саласындағы өзекті мәселелерді қозғап, ҚР Премьер-Министрінің орынбасары Ерболат Досаевқа депутаттық сауал жолдаған болатын. Олардың айтуынша, біліктілік санатына қосымша ақы берілмейтіндіктен, жалақы деңгейінің төмендігі ТжКБ жүйесіне тәжірибелі оқытушыларды тартуға мүмкіндік бермей отыр.
Сауалға жауап берген Ерболат Досаевтың хабарлауынша, техникалық және кәсіптік білім беру жүйесінде (ТжКБ) қазіргі таңда Қазақстанда 824 колледж бар. Онда 37 мың инженер-педагог кадрлар (ИПК) мен өндірістік оқу шеберлері жұмыс істейді.
«Мемлекет басшысының 2018 жылғы 10 қаңтардағы Жолдауын іске асыру барысында мектеп мұғалімдерін аттестаттау жүйесінің жаңа тәсілдері әзірленген. Колледж оқытушылары мен өндірістік оқу шеберлері бұл аттестаттау жүйесіне кірмейді. Оларға біліктілік санаттары үшін (мектеп мұғалімдерімен бірдей) қосымша ақы төлеу көзделмеген», - дейді Ерболат Досаев.
Оның жауабына сәйкес, бүгінгі күні «НЗМ» ДБҰ деңгейлік курстардан өткен мұғалімдерге қосымша ақы көзделмейді.
«Білім беру жүйесін дамытудың негізгі мақсаттарының бірі педагогтің біліктілік деңгейіне тиісті қосымша ақы төлеумен сапалы білімді қамтамасыз ету болып табылады. Соған байланысты ТжБК жүйесі үшін «НЗМ» ДБҰ тәжірибесін қолдану қарастырылмайды», - делінген жауапта.
Жауапқа сүйенсек, педагогтерді аттестаттау және олардың жалақысын жоғарылату мәселелерін жүйеге келтіру мақсатында ҚР БҒМ жұмыс тобын құрған. Олар 9-сынып базасында оқуға түскен студенттерді оқытатын жалпы білім беру пәндерінің оқытушыларына жаңартылған білім беру мазмұны жағдайындағы жұмыстары үшін қосымша ақы белгілеу мәселелерін (30% көлемінде, 10-11 сыныптарды ауыстыру 2019 және 2020 жылдарға жоспарланған) және ағылшын тілінде сабақ жүргізгені үшін (ЛЖ 200%), сондай-ақ оларды мұғалімдерді аттестаттаудың жаңа жүйесіне қосу мәселелерін (30% - дан 50% - ға дейін қосымша ақымен) қарайтын болады.
«Сондай-ақ жұмыс тобы ТжКБ ұйымдарының арнайы пәндер оқытушылары мен өндірістік оқу шеберлері үшін ұлттық біліктілік тест әзірлеу бойынша мәселелерін қарастыруда (санаты үшін 30% - дан 50% - ға дейін қосымша ақы белгілеу, 8 мыңға жуық адам). Жоғарыда баяндалғандарды ескере отырып, Білім және ғылым министрлігі көрсетілген бағытта жұмысты белгіленген тәртіпте жалғастыратын болады», - дейді Ерболат Досаев.