Халықты және инфрақұрылымды көктемде өзендердің арнасынан асуына байланысты қауіптерден қорғау үшін көптеген іс-шаралар қолға алынды.
Су тасқынының ықтимал салдарын болдырмау мақсатында жергілікті атқарушы органдар төтенше жағдайлар департаменттерімен бірлесіп, қорғаныс бөгеттері мен біліктерін тұрғызу, су бұру арналары мен арықтарды құру, сондай-ақ жаңа жаңбыр суының жүйелері мен су өткізу құрылыстарын салып жатыр.
Сонымен бірге, ТЖМ қызметкерлері 2025 жылғы су тасқынына қарсы іс-шараларды іске асыру бойынша өңірлердің дайындығын тексеріп жатыр.
Қарағанды облысында су тасқыны кезеңіне дайындық жұмыстары аяқталды және жалпы 180 инженерлік іс-шара жүргізілді. Онда 65 км қорғаныс бөгеттері мен біліктері тұрғызылып, нығайтылды, 18 шақырымнан астам өзен арналарының қауіпті учаскелеріне санация жүргізілді, 26 км дренаждық және су бұру жүйелері тазартылды. Автожолдардың 75 учаскесінде су өткізу қабілеті артты.
Қазіргі уақытта облыста материалдық-техникалық, жанар-жағармай, азық-түлік, инертті материалдар және қапшықтар резерві құрылды. Елді мекендерден қар шығару жұмыстары жандандырылды. Су өткізу құбырларын тазарту, каналдар мен траншеяларды қазу, сондай-ақ тасқын су төгінділерін автоматты тазарту жұмыстары ақпан айында басталады.
Ақтөбе облысында 2025 жылғы су тасқынына дайындық мақсатында инженерлік жұмыстар жоспарын орындауға ерекше назар аударылған. Жоспардағы су тасқынына қарсы 104 іс-шара іске асырылды, тағы 31 шара жүргізіліп жатыр.
Мамандар Шығыс Қазақстан облысы Глубокое ауданындағы өзендерде мұз кептелістері мен сеңнің жүруін тексерді. Аудан аумағын толығымен қар басқан. Аэровизуалды мониторинг су тасқыны болжамын барынша тиімді жасауға мүмкіндік береді. Қазіргі уақытта мұз кептелістері мен сеңнің жүруі байқалмайды. Глубокое ауданында таулы аймақтағы қар жамылғысының биіктігі 60 см-ге жетеді. Мұнда 26 көшкін қаупі ошағы бар. Жақында қауіпсіздік мақсатында «Өскемен-Горная — Үлбі-Северное» автожолында көшкіндер профилактикалық мақсатта түсірілді, нәтижесінде 2090 текше метр қар түсті.
ТЖМ өкілдері Солтүстік Қазақстан облысының Қызылжар, Шал ақын, Ғ.Мүсірепов, Есіл аудандары мен Петропавл қаласын аралап шықты. Онда 2024-2025 жылдарға арналған инженерлік жұмыстар жоспарын іске асыруға баса назар аударылды, су тасқынына қарсы 90 іс-шара орындалды, тағы 19 шара бойынша жұмыстар жүргізілуде.
Батыс Қазақстан облысында қорғаныс құрылыстарының жай-күйіне мониторинг жүргізілді және Жайық суының тасу қаупі зерттелді. Су тасқыны қауіпсіздігі үшін Теректі, Ақжайық, Бәйтерек аудандарында Жайық өзенінің бойында орналасқан қорғаныс бөгеттерінің жай-күйіне тексеру жүргізілді.