Министрдің айтуынша, репетиторлық қызмет тек Қазақстанда ғана емес, әлемнің көптеген елдерінде бар құбылыс.
– Мұндай тәжірибе тек Қазақстанда емес, бүкіл әлемде бар. Әсіресе Азия елдерінде ата-аналар балалардың болашағына өте қатты мән береді. Біз де азиялық мәдениеттегі қоғам болғандықтан, ата-аналар балаларына барынша жақсы мүмкіндік жасауға тырысады, – деді ол.
Саясат Нұрбек Қытай тәжірибесіне де тоқталды. Оның айтуынша, ол елде репетиторлық қызметке шектеу енгізілгенімен, бұл көлеңкелі нарықтың пайда болуына әкелген.
– Мысал ретінде Қытайды алуға болады, онда репетиторлық қызмет заңмен тыйым салынған. Бірақ бұл жеке репетиторлар мен дайындық қызметтерінің көлеңкелі нарығын күшейтті, өйткені сұраныс одан да жоғары болды, – деді министр.
Оның сөзінше, жеке орталықтардың үздік нәтижелерді жарнама ретінде пайдалануы – нарықтық тәжірибенің бір бөлігі.
– Менің жеке пікірім – бұл толық дұрыс емес. Бұл маркетинг. Орталықтар үшін бұл көрсеткіш: егер оқушы жоғары балл алса, оны жарнама ретінде қолданады. Кейбір орталықтар айналасында үлкен хайп қалыптастырады, – деді Саясат Нұрбек.
Сонымен бірге ол бұл нарықтың құқықтық тұрғыдан реттелетінін атап өтті.
– Бірақ, екінші жағынан, Кәсіпкерлік кодекс бар. Бұл – қызмет көрсету нарығы. Заң кәсіпкерлердің құқықтарын қатаң қорғайды. Сондықтан мұндай білім беру нарығы бар және ол жұмыс істеп тұр, – деді министр.
Сондай-ақ Саясат Нұрбек жоғары баллды репетиторсыз да жинауға болатынын атап өтті.
– Әрине, болады. Өткен жылы да репетиторсыз-ақ жоғары балл алған оқушылар болды. Ең бастысы – жүйелі дайындық, мектептегі сапалы білім және оқушының жеке мотивациясы, – деп түйіндеді министр.
Айта кетейік, Қызылорда облысының Шиелі ауданындағы ШоқанУәлиханов атындағы №127 орта мектеп-лицейдің бітіруші түлектері, егіз қыздар Кәусар және Гауһар Алтынсары ҰБТ-да жоғары нәтиже көрсетіп, аймақ мерейін үстем етті.