Бағдарламаны жүзеге асыруға қажетті инвестицияның жалпы көлемі шамамен 6,6 трлн. теңгені құрайды. Мұның 6 трлн. теңгесі квазимемлекеттік және жеке сектор есебінен тартылады. Ал бюджет тарапынан бөлінетін қаржы шамамен 650 млрд. теңгеге жуық. Осылайша, мемлекеттің әрбір теңге инвестициясына кемінде 4 теңге жеке инвестиция тартуды көздейтін «қаржылық тетік» әдісі жүзеге асырылатын болады.
Айта кетерлігі, 2010-2013 жылдары аралығында бұл мемлекеттік бағдарламаны қаржылай қолдау үшін шамамен 3,7 трлн. теңге бөлінген болатын. Бұдан бөлек инвестициялық жобаларды жүзеге асыруға 2,4 трлн. теңге жеке инвестиция қосымша тартылған еді. Нәтижесінде аталған кезеңде ЖІӨ екі есе өсіп, 2013 жылы 34,1 трлн. теңгеге жетті. Өткен жылдың қорытындысында өңдеу өнеркәсібіндегі еңбек өнімділігі 57,5 мың АҚШ долларын құрап, 2008 жылмен салыстырғанда 1,6 есе өсім көрсетті.