Уимблдон: Елена Рыбакина үшінші айналымға өтті

АСТАНА. KAZINFORM — Қазақстанның бірінші, әлемнің 4-ракеткасы Елена Рыбакина Уимблдон турнирінің үшінші айналымына өтті.

Қазақстандық теннисші екінші айналымда дүниежүзілік рейтингіде 72-орында тұрған германиялық Лаура Зигемундпен бетпе-бет келді.

Қарсыластар осыған дейін бес рет кездесіп, соның төртеуінде Рыбакина жеңген еді.

Бұл жолы бірінші партияда Елена 3:1 есебімен алға шыққанымен, Зигемунд таразы басын теңестірді. Дегенмен қазақстандық спортшы қатарынан үш геймді алды — 6:3.

Екінші сетті германиялық спортшы брейкпен бастағанымен, Рыбакина есепті теңестірді — 2:2. Алайда сет Зигемундтің еншісінде кетті — 6:3.

Үшінші, шешуші сетте Рыбакина ақыры дегеніне жетті — 6:3.

Екі сағат 12 минутқа созылған тартысты матчта Елена 5 эйспен бірге 12 брейк-пойнттың төртеуін пайдаланды. Зигемунд 1 эйс, 3 брейкпен (13 брейк-пойнт) көзге түсті.

Елена Рыбакина төртінші айналымға шығу үшін әлемнің 25-ракеткасы, канадалық Лейла Фернандес немесе рейтингіде кезінде көш бастаған, қазір 91-орындағы даниялық Каролина Возницкидің қай жеңгенімен таласады.

Тағы бір қазақстандық Юлия Путинцева жұптық сында даниялық Клара Таусонмен бірге алғашқы айналымда ресейліктер Елена Веснина — Диана Шнайдерге жол берді — 6:4, 6:7. (6:8), 0:6.

Ю.Путинцева жекелей сында үшінші айналымда әлемнің 1-ракеткасы, Польша өкілі Ига Швентекпен ойнайды. Ига екінші кездесуінде хорватиялық Петра Мартичті жолдан тайдырды — 6:4, 6:3.

Еске сала кетейік, бұдан бұрын Уимблдонда Анна Данилинаның екінші айналымға жолдама алғанын жазған болатынбыз.

Сондай-ақ Тимофей Скатов Франциядағы жарыстың ширек финалына шықты.