17:13, 30 Маусым 2014

Уимблдон турнирінде Я.Шведова мен З.Дияс келесі қарсыластарын ұтса, өзара кездеседі

ОРАЛ. ҚазАқпарат - Бүгін қазақстандық теннисші Ярослава Шведова да Уимблдон турнирінің төртінші айналымына шықты.

Оның американдық теннисші, әлемнің 30-ыншы ракеткасы Мэдисон Киспен кездесуі сенбі күні 7:6, 6:6 болып тұрған жерінен қараңғылықтың түсуіне байланысты кейінге қалдырылған болатын. Бүгін М.Кис жарақатына байланысты матчты жалғастырудан бас тартты. Я.Шведова төртінші айналымда неміс қызы Сабин Лисицки немесе сербиялық Ана Ивановичтің бірімен кездеседі. Бұған дейін «үлкен дулығаның» төртінші айналымына өз өмірінде бірінші рет Зарина Дияс шыққан болатын. Оның қарсыласы әлдеқайда мықты - әлемнің үшінші ракеткасы, румыниялық Симона Халеп. Австралияның биылғы ашық чемпионатында Зарина осы теннисшіге жол берген еді. Егер Я.Шведова мен З.Дияс бұл қарсыластарын ұтатын болса, онда ширек финалда өзара жолығысады.

Спорт
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).