«Үлкен дулыға» турнирі: Новак Джокович 24-ші мәрте чемпион атанды
Н.Джокович финалда ресейлік, әлемнің 3-ракеткасы Даниил Медведевті 6:3, 7:6 (7:5), 6:3 есебімен тізе бүктірді.
Осылайша, әлемдік рейтингте қайтадан көш бастайтын сербиялық спортшы «Үлкен дулыға» турнирін 24 рет ұтып алды. Бұл көрсеткіш жөнінен ол аустралиялық теннисші Маргарет Кортпен теңесті.
Жарыстағы жеңісі үшін Джокович 2 мың рейтингілік ұпайға ие болып, 3 млн АҚШ доллары көлемінде табыс тапты. Д.Медведевтің үлесіне 1200 рейтингілік ұпай мен 1,5 млн доллар тиді.
Сонымен қатар 36 жастағы Джокович АҚШ ашық чемпионаты тарихында ең жасы үлкен жеңімпаз болды. Новак аустралиялық Кен Розуолдың рекордын жаңартты. Бұл теннисші 1970 жылы 35 жасында үздік шыққан еді.
Еске сала кетейік, бұдан бұрын АҚШ ашық чемпионатында 19 жастағы теннисшінің жеңімпаз атанғанын жазған болатынбыз.