Ұлтаралық араздықты тудырған Т.Щевцова-Валоваға қатысты сот үкімі өзгеріссіз қалдырылды

АСТАНА. ҚазАқпарат - Алматы қалалық сотының қылмыстық істер жөніндегі апелляциялық алқасы ұлтаралық араздықты тудырғаны үшін сотталған Татьяна Шевцова-Валоваға қатысты сот үкімін өзгеріссіз қалдырды.

Бұл туралы Алматы қалалық сотының баспасөз қызметінен хабарлады.

2015 жылы 1 сәуірде Алматы қаласының Алатау аудандық сотымен Т.Шевцова-Валова ҚР ҚК 164-бабы 1-бөліміне сәйкес сотталған. Үкімге сәйкес ол 3 жыл сынақ мерзімімен 4 жылға шартты түрде бостандығынан айырылды. Еске сала кетейік, 11 қоғамдық белсенді Facebook желісінің пайдаланушысы Т.Шевцова-Валованы ұлтаралық араздықты қоздырғаны үшін айыптады. Бұған Т.Шевцова-Валованың әлеуметтік желідегі жазбалары себеп болған. Т.Шевцова-Валова мамандандырылған мемлекеттік органға ескертпей елден шыға алмайды, жұмысын немесе тұрғылықты жерін ауыстыру құқығынан айырылған. Ол 48500 теңге көлемінде сот шығынын төлеуі тиіс. «Сот үрдісі кезінде айғақтар тексерілді. Оларға сәйкес айыпталушы 2014 ж. наурыздың басында «Facebook» әлеуметтік желісінің пайдаланушыларымен хат жазысқан. Сөйтіп Т.Шевцова-Валова қасақана ұлтаралық араздықты қоздырып, азаматтардың ұлттық намысын қорлады, азаматтарды ұлтына қарай бөліп, бейпіл сөздерді қолданған», - делінген қалалық соттың хабарламасында.