АСТАНА. KAZINFORM - Футболдан UEFA Ұлттар лигасы бесінші турының алғашқы ойын күні өтті.
Аталған турда жанкүйерлер А лигасы екінші тобындағы Бельгия мен Италия кездесуіне назар аударды. Турнир барысында жақсы ойын өрнегін көрсетіп келе жатқан италиялықтар бұл жолы да сол қарқынынан жаңылған жоқ. Кездесу тағдырын жалғыз гол шешті.
Осылайша италиялық футболшылар қарсыласын 1:0 есебімен қапы қалдырып, турнир кестесіндегі жағдайын жақсартып алды. Қазір олар өз тобында көш басында тұр.
Аталған топтағы Франция мен Израиль 0:0 есебіне қанағат білдірді.
Сондай-ақ В лигасындағы екінші топта Ирландия Финляндияны 1:0, Англия Грекияны 3:0 есебімен тізе бүктірді.
Ал В лигасының үшінші тобындағы Норвегия құрамасы сырт алаңда Словенияны 1:4 есебімен жеңсе, Қазақстан құрамасы Аустрияға 0:2 есебімен жол берді.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.