16:36, 17 Мамыр 2024

«Ұлттық қор – балаларға»: министрлік бір балаға аударған қаржы сомасын атады

АСТАНА. KAZINFORM – 2023 жылы Ұлттық қордың қаражатын басқару тиімділігі бойынша оң өзгерістер байқалды. Бұл туралы Мәжілісте 2023 жылға арналған республикалық бюджеттің атқарылуы туралы Үкімет есебін баяндаған қаржы вице-министрі Дәурен Темірбеков айтты.

Фото: Kazinform

«Ұлттық қордың активтері оның алдындағы жылға қарағанда 10 пайызға өсіп, 65,7 млрд АҚШ долларын құрады», - деді Д. Темірбеков.

Министрлік мәліметінше, кейінгі 3 жылда Ұлттық қор активтері өсуінің оң динамикасы байқалды:

1. 2021 жыл - 59,4 млрд АҚШ доллары (оның ішінде валюталық активтер - 55,3 млрд АҚШ доллары)

2. 2022 жыл - 57,9 млрд АҚШ доллары (оның ішінде валюталық активтер - 55,7 млрд АҚШ доллары)

3) 2023 жыл 65,7 млрд АҚШ доллары (оның ішінде валюталық активтер - 60,0 млрд, АҚШ доллары).

Кепілдендірілген трансферт 2022 жылғы 4 трлн теңгеден 2023 жылы 2,2 трлн теңгеге (екі есеге жуық) дейін төмендеді. 2024 жылдан бастап кепілдендірілген трансферт мөлшері жылына 2 трлн теңгеден аспайды.

Сонымен қатар, «Ұлттық қор – балаларға» бағдарламасы бойынша 2024 жылы 1 балаға есептелген сома 100,52 АҚШ долларын құрады.

Бюджет Мәжіліс ҚР Қаржы министрлігі Қаржы Ұлттық қор - балаларға

Руслан Ғаббасов

Ақмола облысының Біржан сал ауданында дүниеге келген. Л.Н. Гумилев атындағы Еуразия ұлттық университетінің журналистика факультетін бітірген. 2005 жылдан бері «ҚазАқпарат» халықаралық ақпарат агенттігінде жұмыс істеп келеді.