Ұлттық музейде Қытайдың ежелгі қолөнер жауһарлары көрмесі ашылды
АСТАНА. KAZINFORM — 22 қазанда Қазақстан Республикасының Ұлттық музейінде «Өркениет іздері — Қытайдың ежелгі қолөнер жауһарлары» атты көрме қоғам назарына ұсынылды.
Көрме Қазақстан Республикасының Ұлттық музейі мен Қытайдың Тяньцзинь музейінің бірлескен ұйымдастыруымен ашылды.
Іс-шараның ашылу рәсімінде ҚР Мәдениет және ақпарат министрлігі Мәдениет комитетінің төрағасы Ерлан Дәкенов Мәдениет және ақпарат министрі Аида Балаеваның құттықтау хатын оқып берді.
Министр өз құттықтауында Қытай және Қазақстан басшыларының қолдауы мен бастамаларының арқасында «Қытайдағы Қазақстанның туризм жылы» және «Қазақстандағы Қытайдың туризм жылы» аясында бірқатар мәдени іс-шара өткізілгенін атап өтті.
Осы жобалар аясында екі ел арасындағы мәдени және гуманитарлық ынтымақтастық едәуір дамып, өзара түсіністік пен достықтың жаңа деңгейіне көтерілгенін жеткізді.
Сондай-ақ Аида Балаева өткен жылы Тяньцзинь музейінде өткен «Алтын адам және дәулетті дала: Қазақстан тарихының жәдігерлері» атты көрменің табысты өткенін еске алып, бұл жобаның екі ел арасындағы саяси сенімге негізделген достық қатынастың айқын көрінісі болғанын атап өтті.
Министр жаңа көрмеге табыс тілеп, оның Қазақстан мен Қытай арасындағы жоғары деңгейдегі мәдени байланыстарды одан әрі нығайтуға ықпал ететініне сенім білдірді.
Көрменің ашылу рәсіміне Қытай Халық Республикасының Қазақстан Республикасындағы Төтенше және Өкілетті елшісі Хань Чуньлин, қоғам және мәдениет қайраткерлері, сондай-ақ өнер сүйер қауым өкілдері — барлығы жүзге жуық адам қатысты.
Экспозиция «Қытай керамикасының сазы», «Шеберлік ғажайыбы», «Жібек өрнекті Қытай», «Тяньцзиньнің келбеті» атты бөлімдерден тұрады.
Көрмеге барлығы 62 (жиынтық) жәдігер қойылған. Олардың қатарында сүйек жазбалар, қыш бұйымдар, нефриттен жасалған әшекейлер және басқа да тарихи құндылықтар бар.
«Өркениет іздері — Қытайдың ежелгі қолөнер жауһарлары» көрмесі Қытай шеберлерінің даналығы мен шығармашылық қуатын паш етіп қана қоймай, Қазақстан халқының көршілес елдің бай мәдени мұрасымен және көне өркениетінің рухани қазынасымен жақынырақ танысуына мүмкіндік береді.
Бұл шара екі халық арасындағы достық пен мәдени өзара түсіністікті одан әрі тереңдетуге бағытталған маңызды мәдени бастама саналады.
Осыдан бұрын Ұлттық музейде «Зергерлік код» халықаралық көрмесі өткенін жазған едік.