Үнді кинокомпаниясы Алматыда кино түсіреді

АСТАНА. ҚазАқпарат - Шәкен Айманов атындағы «Қазақфильм» АҚ үндінің «Khushi Motion Pictures» атты компаниясымен ынтымақтастық туралы келісім шартқа қол қойды, деп хабарлайды ҚР Мәдениет және спорт министрлігінің баспасөз қызметі.

Бірлескен өндіріс жөніндегі келісім бойынша, екі жақ  «Love you family» толықметражды көркем фильмінің дистрибуциясы саласында қызмет етуге міндеттеледі.

- Бірлесіп фильм шығару бойынша келісім шарт - үнді кинематографиясымен ынтымақтастық жолында жасалған маңызды қадам. Фильмнің түсіру тобы Қазақстанда алты күн жұмыс істейді. Үндістаннан келген әріптестерімізге біз жан-жақты көмек көрсетуге дайынбыз. Жалпы, киностудия шетелдің кинокомпанияларымен серіктестік қарым-қатынастарын нығайтуда жұмыстар атқарып жатыр,  - деді Ш.Айманов атындағы «Қазақфильм» АҚ вице-президенті Серік Жұбандықов.

Үнді режиссері Сачиндр Шарм түсіріп жатқан «Love you family» фильмінің түсіру жұмыстары Үндістанда және Тайландта өтті. Картинаның қорытынды түсірілімдері Алматы қаласында жүргізіледі. Көркем фильмде Джоши Маной Наванет, Пардасани Акша Сунил, Салман Юсуф Кхан, Шакти Капур, Навни Парихар есімді үнді елінің танымал актерлері ойнайды. Сонымен қатар аталған фильмде еліміздің танымал актері Фархат Әбдірайымов басшының рөлін сомдайтын болады.   

- Бұл картинада мен түсетін күндер төртеу ғана. Рөлім өте қызық, күлкілі болатын сияқты. Жалпы мен Англия, Ресей, Өзбекстан, Қырғызстан сынды көптеген елдердің фильмдеріне түстім. Түсінгенім, түсірілім жұмыстары барлық елде бірдей өтеді екен. Біздің кинематографистерден еш айырмашылығы жоқ,- деді актер Фархат Әбдірайымов.  

«Love you family» фильмінде өзінің сүйіктісі Раджбен кездесуге ата-анасы қарсы болған Хуши Девани есімді үнділік бойжеткеннің өмірі баяндалады. Қос ғашық үлкендердің батасын алмай, некелерін қидырады. «Үйлену оңай, үй болу қиын» демекші, уақыт өте келе жан күйзелісі мен тұрмыстық қиындықтан қажыған бас кейіпкер Қазақ­станнан жаңа жұмыс тауып, біржола көшіп кетеді. Еңбекқорлығының нәтижесінде жергілікті компанияның бірінде басшылық қызметке дейін көтеріледі.

Сонымен қатар, «Қазақфильм» АҚ мемлекеттік-жекеменшік серіктестік бағдарламасы бойынша екі бірдей бірлескен жобаны жүзеге асырып отыр.  Олар, Қазақстан мен АҚШ арасындағы жаңа форматтағы бірлескен ең бірінші жоба «Әміре» фильмі және қытайлық кинематографистермен жүзеге асырғалы отырған   қытай халқының композиторы Си Синхайдың өмірі мен шығармашылығы туралы «Композитор» көркем фильмі болмақ.