Үндістанда екі пойыздың апатқа ұшырауынан 24 адам қаза тапты

АСТАНА. ҚазАқпарат - Үндістанның орталық бөлігінде екі пойыздың вагондары өзенге құлап, кем дегенде 24 адам қаза тапты, деп хабарлады NDTV.

Оқиға сейсенбі күні 4 тамызда кешке Мадхья-Прадеш штатындағы Харда елді мекенінің маңында болған.

Көпірден өту кезінде Мумбаи - Варанаси бағытында жүрген пойыздың 6 вагоны рельстен шығып кетті. Бірнеше минуттан кейін сол жерде Джабалпер - Мумбаи пойызының 3 вагоны мен локомотив рельстен тайды.

Теміржол компаниясы өкілдерінің айтуынша, апат қатты нөсер салдарынан орын алуы мүмкін.

Құтқарушылар 300-ден астам адамды қауіпсіз жерге шығарды. Шамамен 40 адам түрлі жарақат алды.