Үндістан мен Пәкістан соққыларын күшейте түсті: екі тарапта да қаза тапқандар саны артып келеді

АСТАНА. KAZINFORM — Үндістан мен Пәкістан бір-бірін жаңа шабуылдарға айыптап, бейбіт тұрғындар арасындағы ондаған адамның қаза тапқанын хабарлады. Бұл екі ядролық державаның соңғы 20 жылдағы ең шиеленісті қақтығысы болып отыр, деп жазды Euronews.

Үндістан 22 сәуірде Кашмирде 26 турист қаза тапқан терактіге жауап ретінде «лаңкестік инфрақұрылымға» соққы берілгенін мәлімдеді. Бұл шабуыл үшін бұрын белгісіз, бірақ пәкістандық «Лашкар-и-Тайба» ұйымымен байланысы бар топ жауапкершілікті өз мойнына алды. Ал Пәкістан бұл айыптауларды жоққа шығарып, соққылар бейбіт ауылдар мен мешіттерге бағытталып, соның салдарынан, оның ішінде бір бала бар, 26 адам қаза тапқанын хабарлады.

Пәкістан жауап ретінде Үндістанның бес ұшағын атып түсіргенін мәлімдеді. Үндістан бұл мәлімдемені жоққа шығарып, соққылар тек нақты нысаналарға бағытталғанын айтты. Екі ел де көптеген құрбандар мен зардап шеккендер туралы хабарлады.

Пәкістан ауруханаларда төтенше жағдай режимін енгізіп, үндістандық дипломатты наразылық ретінде шақырды. Үндістан премьер-министрі Нарендра Моди мен Пәкістан премьері Шахбаз Шариф шұғыл отырыстар өткізді. Шариф Пәкістанның бұл «соғыс әрекетіне» жауап беріп жатқанын мәлімдеді.

Халықаралық қауымдастық алаңдаушылық білдіріп отыр. Еуроодақ, Ұлыбритания, Қытай сондай-ақ БҰҰ тараптарды сабырға шақырып, жанжалды ушықтырмауға және тез арада деэскалацияға шақырды, себебі кең ауқымды соғыс қаупі туындап отыр.

Бұған дейін Үндістан Пәкістан бақылауындағы Джамму және Кашмир аймақтарына соққы бергенін және бұл аумақтарда Үндістанға қарсы лаңкестік шабуылдар жоспарланып, басқарылған «террористік инфрақұрылым» орналасқанын мәлімдеген еді.