Университет оқытушылары аймақ оқушыларын республикалық және халықаралық олимпиадаларға дайындайды, деп хабарлайды ҚазАқпарат тілшісі.
Облыстық білім басқармасының басшысы Гүлсім Қожахметова бейіндік мектептер екі жоғары оқу орны – Е. А. Бөкетов атындағы Қарағанды университеті және Қарағанды экономикалық университеті базасында құрылатынын хабарлады.
Онда олимпиада командасының резервіне кіретін 7-9 сынып оқушылары білімдерін жетілдіре алады. Сабақтар қоғамдық-гуманитарлық пәндер, физика, информатика, экономика, қолданбалы математика, ағылшын тілі бойынша өткізілетін болады.
«Осы жылдың маусым айында біз балаларға қосымша білім берудің «Сарыарқа дарыны» өңірлік ғылыми-тәжірибелік орталығымен өзара ынтымақтастық туралы меморандумға қол қойдық. Оқушылардың білімін жетілдіру бойынша бірлескен білім беру іс-шаралары туралы уағдаластық орнатылды. Оқушыларды олимпиадаларға дайындау басым бағыт болып табылады. Семинарлар, шығармашылық байқаулар, ғылыми конференциялар мен тренингтер жоспарланған», – деді ҚЭУ ректоры Ерқара Аймағамбетов.
Оның айтуынша, университет өз базасын ұсынады. Олар: «Достық» коворкинг-орталығының бизнес-инкубаторы, компьютерлік орталық, оқу және ғылыми-зерттеу зертханалары және т. б.
Гүлсім Қожахметова оқушылардың білім сапасын арттыру бойынша өзге де бастамаларды атап өтті. Бұл жобалар «Жас математик», «Қала – ауыл», «Виртуалды мектеп» сырттай мектебі. Жаңа оқу жылында экология, медиасауаттылық, сыни ойлау курстары ашылады.