НҰР-СҰЛТАН. ҚазАқпарат – Қазақстандық, әлемнің 129-ракеткасы Михаил Кукушкин US Open турнирі іріктеу сайысының финалына шықты, деп хабарлайды ҚазАқпарат тілшісі.
Іріктеу сайыстарының 13-ракеткасы болып тіркелген М.Кукушкин жартылай финалда дүниежүзілік рейтингте 168-сатыда тұрған, тайбэйлік Джейсон Джангпен шеберлік байқасады.
Қазақстандық теннисші қарсыласын 6:4, 6:3 есебімен екі сетте ұтты.
1 сағат 26 минутқа созылған матч барысында М.Кукушкин 2 эйс жасап, 5 брейк-пойнттың үшеуін пайдаланды. Тайбэйлік спортшы 1 эйспен ғана шектелді.
М.Кукушкин іріктеу сайыстарының финалында әлемнің 150-ракеткасы, франциялық Антуан Оанмен күш сынасады. Оны жеңсе, негізгі турнирге жолдама алады.
Қазақстанның бірінші, әлемнің 37-ракеткасы Александр Бублик 30 тамызда басталатын негізгі жарыста өнер көрсетеді. Оның қарсыласы – рейтингте 134-сатыдағы германиялық Янник Ханфманн.
Еске сала кетейік, бұдан бұрын М.Кукушкиннің US Open турнирінің іріктеу сайысын жеңіспен бастағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).