АСТАНА. KAZINFORM — Қазақстандық теннисшілер Заңғар Нұрланұлы мен Дамир Жалғасбай жұптық сында жасөспірімдер арасында АҚШ ашық чемпионатының 1/8 финалына шықты.
Қазақстандық жұп бастапқы кездесуін колумбиялық Алехандро Арсила – америкалық Максимус Дюссомен өткізді.
Бірінші партияда Заңғар мен Дамир тай-брейкте табандылық танытты – 7:6 (8:6).
Екіншісінде колумбиялық-америкалық дуэт есе қайырды – 6:4.
Супер тай-брейкте Нұрланұлы мен Жалғасбай жеңісті жұлып алды – 10:8.
Тартысты бәсеке сағат жарымнан астам уақытқа созылды.
Заңғар Нұрланұлы мен Дамир Жалғасбай ширек финалға шығу үшін германиялықтар, жекелей сында жасөспірімдер арасында 2025 жылғы Ролан Гаррос турнирінің чемпионы Нильс Макдональд – сол жарыстың финалисі Макс Шёнхауспен таласады.
Н.Макдональд пен М.Шёнхаус АҚШ ашық чемпионатында жұптық сында екінші ракетка ретінде тіркелген.
Еске сала кетейік, бұдан бұрын АҚШ ашық чемпионатында Заңғар Нұрланұлының сенсация жасап, үшінші айналымға шыққанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).