Ұсақ бұзақылық үшін жаза күшейтіледі

АСТАНА. KAZINFORM – 2025 жылдың 1 қыркүйегінен ұсақ бұзақылық үшін жаза күшейтіледі. Бұл туралы Сенат депуттарының сауалына Премьер-министр Олжас Бектеновтің жауабында айтылған.

- 2025 жылғы 10 қаңтарда «Әкімшілік құқық бұзушылық туралы кодекске өзгерістер мен толықтырулар енгізу туралы» заң (бұдан әрі – ӘҚБтК) қабылданды. ӘҚБтК қоғамдық жұмыстар институтын енгізетін 49-1, 49-2 және 914-1- баптармен толықтырылды. Аталған нормалар 2025 жылғы 1 қыркүйектен бастап күшіне енеді, - деді Үкімет басшысы.

Сонымен қатар, ол ұсақ бұзақылық үшін санкциялар (ӘҚБтК-нің 434-бабы) күшейтілгенін атап өтеді. Нақты атқанда, аталған баптың:

– 1-бөлігі бойынша: 20 АЕК (1 АЕК 3 932 теңге) мөлшерінде айыппұл не 5-тен 15 тәулікке дейінгі мерзімге қамауға алу, сондай-ақ 20-дан 60 сағатқа дейінгі міндетті қоғамдық жұмыстар көзделген;

– 2-бөлігі бойынша: 15-тен 30 тәулікке дейін қамауға алу және 60-тан 100 сағатқа дейін қоғамдық жұмыстар санкциясы енгізілді.

- Осылайша, бұзақылық әрекеттер үшін жазаны қатаңдату мәселесі мүдделі мемлекеттік органдар тарапынан уақтылы қаралып, тиісті шаралар қабылданып жатқанын жеткіземіз, - деді Олжас Бектенов.

Естеріңізге сала кетсек, сенатор Геннадий Шиповских елімізде бұзақылық әрекеттер — мектептердегі агрессивті мінез-құлықтан бастап, көшедегі төбелестер көбейіп бара жатқанына алаңдаушылық танытып, Үкімет басшысының атына депутаттық сауал жолдаған еді.