V Дүниежүзілік көшпенділер ойыны несімен есте қалды
АСТАНА. KAZINFORM – Елордада ұйымдастырылған 5-ші Дүниежүзілік көшпенділер ойындары мәресіне жетті.
8-13 қыркүйек күндері өткен көшпенділер Олимпиадасына 90-ға жуық мемлекеттен 2500-ден астам спортшы қатысып, 21 спорт түрінен 97 медаль жиынтығын сарапқа салды.
Енді осы әлем назарын Астанаға аударған бәсі биік доданың қалай өткенін, несімен есте қалғанына тағы бір қысқаша шолу жасап өтсек.
V Дүниежүзілік көшпенділер ойындары аясында апта бойы 21 спорт түрінен сайыстар, «Көшпенділер ғаламы» этноауылында мәдени шаралар, ғылыми бағдарлама шеңберінде «Көшпенділер: тарих, білім, сабақтар» атты ғылыми-практикалық коференция ұйымдастырылды.
«Қазанат» ипподромы маңындағы этноауылда 100-ден аса мәдени іс-шара ұйымдастырылды. Еліміздің барлық өңірінен жиналған өнерпаздар күнделікті концерттер, ауылшаруашылығы жәрмеңкелерін, көрме, айтыс сайысын өткізді. Белгілі фотожурналист Джимми Нельсон киіз үй ішінен фотостудия құрды. Сондай-ақ, UNESCO, UNICEF, Alageum киіз үйлері тігілді.
21 спорт түрі қамтылған сайыстар алты күн бойы 6 түрлі нысанда өтті. Нақтырақ айтсақ, «Қазанат» ипподромы, «Арғымак» спорт алаңы, этноауыл, Ж. Үшкемпіров атындағы жекпе-жек сарайы, «Алау» мұз сарайыларында спортшыларымыз өзара мықтыны анықтады.
V Дүниежүзілік көшпенділер ойындарын ұйымдастыру дирекциясы әдепкіде, этноспорттың 21 түрі бойынша 97 медаль жиынтығы сарапқа салынады деп жариялаған болатын. Шетелдік құрамалардың өтініші бойынша жарыс барысында дәстүрлі садақ атудан қосымша «пұт», «қалқан» және «жамбы» нысаналары бойынша қыздар сайысы қосылып, медаль жиынтығы 100-ге жетті. Қазақстан спортшылары 112 медальмен көш бастады. Оның 43-і алтын, 32-і күміс және 37-сі қола жүлде.
Екінші орынды Қырғызстан ойыншылары еншіледі. Қырғыз спортшыларының қоржынына 65 медаль түсті. Оның 19-ы алтын, 21-і күміс және 25-і қола медаль.
Медаль саны бойынша үшінші орынды Ресей спортшылары иеленді. Олар 12 алтын, 12 күміс және 25 қола – жалпы 49 медаль жеңіп алды.
Ойындарға қатысушылардың көбі – қазақстандықтар. Елімізден 195, Қырғызстаннан 172, Ресейден 144 спортшы қатысты.
Қатысушылар мен қонақтарға 1600-ге жуық волонтер көмектесіп жүрді.
Этноауылда өткен жабылу рәсіміне спортшылар да қатысты. Оларды 1000-ға жуық волонтер мен этноауыл қонақтары қошеметпен қарсы алды. Жиында Дүниежүзілік этноспорт конфедерациясының президенті Нежмеддин Біләл Ердоған, Қазақстанның Туризм және спорт министрі Ербол Мырзабосынов, Қырғызстан Республикасының Мәдениет, ақпарат, спорт және жастар саясаты министрі Алтынбек Мақсұтов, 5-ші Дүниежүзілік көшпенділер ойындарын дайындау және өткізу дирекциясының жетекшісі Наиль Нұров сөз сөйледі.
Енді 6-шы Дүниежүзілік көшпенділер ойындары Қырғызстанда өтеді. Бұл туралы Нежмеддин Біләл Ердоған салтанатты жиын барысында хабарлады. Ол көшпенділер ойындары Қырғызстанға оралатынын айтып, Алтынбек Мақсұтовқа ДКО символы – торсықты табыстады.
«Қазанат» ипподромының жанында бой көтерген «Көшпенділер әлемі» этноауылында өткен 5-ші Дүниежүзілік көшпенділер ойындарының жабылу салтанатына Туризм және спорт министрі Ербол Мырзабосынов, Дүниежүзілік этноспорт конфедерациясының президенті Біләл Ердоған қатысып, сөз сөйледі. Е.Мырзабосынов байрақты бәсеке ұлттық спортымызды ұлықтап, салт-дәстүрімізді дәріптеп, мәдени мұрамызды төрткүл дүниеге паш еткен бірегей оқиға ретінде тарихта қалғанын атап өтті.
«Мемлекет басшысы Қасым-Жомарт Тоқаевтың тікелей бастамасымен қазақ топырағында ұйымдастырылған Дүниежүзілік көшпенділер ойындары – мәні терең, мазмұны бай бірегей жоба. Оның түркі әлемінің алтын бесігі – Қазақ жерінде жалауын желбіреткені – біз үшін зор мәртебе әрі шын мақтаныш. Ойындарда 30-дан астам елдің спортшылары медаль иеленді. Жүлде алған мемлекеттер қатарында мұхиттың арғы жағынан келген Канада мен Мексика спортшылары да бар. Дүбірлі додаға 90-ға жуық мемлекеттің қатысуы, 30-дан астам елдің жүлдегерлер қатарынан көрінуі – дүниежүзінде көшпенділер ойындарына деген қызығушылықтың артып келе жатқанын аңғартады. Келесі, 6-шы Дүниежүзілік көшпенділер ойындарын бауырлас мемлекет – Қырғыз Республикасы қабылдайды. Қырғыз елінің алдағы бәсекені жоғары деңгейде өткізуіне тілектеспін. Көшпенділер Олимпиадасының беделі биіктей берсін!», – деді Ербол Мырзабосынов.
Енді екі жылдан кейін келесі кезекті Дүниежүзілік көшпенділер ойыны Қырғызстанда өтетін болады.
V Дүниежүзілік көшпенділер ойындарында медаль жеңіп алған елдер тізімі:
# | Елдер | Алтын | Күміс | Қола | Барлығы |
1 | ҚАЗАҚСТАН | 43 | 32 | 37 | 112 |
2 | ҚЫРҒЫЗСТАН | 19 | 21 | 25 | 65 |
3 | РЕСЕЙ | 12 | 12 | 25 | 49 |
4 | ӨЗБЕКСТАН | 11 | 12 | 11 | 34 |
5 | ТҮРКИЯ | 2 | 2 | 2 | 6 |
6 | ИРАН | 1 | 3 | 9 | 13 |
7 | МАЖАРСТАН | 1 | 2 | 5 | 8 |
8 | ТҮРІКМЕНСТАН | 1 | 1 | 2 | 4 |
9 | РУМЫНИЯ | 1 | 1 | 1 | 3 |
10 | ПОЛЬША | 1 | 1 | 0 | 2 |
11 | ҮНДІСТАН | 1 | 0 | 5 | 6 |
12 | ҚЫТАЙ | 1 | 0 | 5 | 6 |
13 | МОЛДОВА | 1 | 0 | 5 | 6 |
14 | ИНДОНЕЗИЯ | 1 | 0 | 1 | 2 |
15 | ФРАНЦИЯ | 1 | 0 | 1 | 2 |
16 | АУСТРАЛИЯ | 1 | 0 | 0 | 1 |
17 | ИТАЛИЯ | 1 | 0 | 0 | 1 |
18 | НИГЕРИЯ | 1 | 0 | 0 | 1 |
19 | МОҢҒОЛИЯ | 0 | 5 | 9 | 14 |
20 | ГРУЗИЯ | 0 | 3 | 5 | 8 |
21 | ӘЗЕРБАЙЖАН | 0 | 2 | 5 | 7 |
22 | ГАНА | 0 | 1 | 1 | 2 |
23 | КАНАДА | 0 | 1 | 1 | 2 |
24 | МЕКСИКА | 0 | 1 | 0 | 1 |
25 | ТӘЖІКСТАН | 0 | 0 | 6 | 6 |
26 | НИДЕРЛАНДЫ | 0 | 0 | 4 | 4 |
27 | ПӘКІСТАН | 0 | 0 | 3 | 3 |
28 | БЕЛАРУСЬ | 0 | 0 | 2 | 2 |
29 | ЛАТВИЯ | 0 | 0 | 1 | 1 |
30 | СЛОВАКИЯ | 0 | 0 | 1 | 1 |
31 | ТАИЛАНД | 0 | 0 | 1 | 1 |
32 | ТОГО | 0 | 0 | 1 | 1 |
33 | ЭСТОНИЯ | 0 | 0 | 1 | 1 |