Вануатудағы жер сілкінісінен 14 адам қаза тапты

АСТАНА. KAZINFORM — Вануату астанасы Порт-Вила қаласында 7,3 балдық жер сілкінісі болды. Кемінде 14 адам қаза тауып, 200-ге жуық адам жарақат алды, деп жазады ВВС.

Жер сілкінісі сейсенбі күні жергілікті уақыт бойынша сағат 12:47–де болды. Төтенше жағдайларды басқару үкіметінің мәліметінше, Порт Вилада кем дегенде 10 ғимарат зақымданған. Жер сілкінісінен кейінгі дүмпулер электр қуаты мен ұялы телефон байланысының үзілуіне себеп болды.

Вануатудағы іскерлік кеңесінің төрағасы Глен Крейг бір ғимарат ерекше зақымданғанын, онда бірнеше елшіліктер, соның ішінде АҚШ елшілігі мен Ұлыбританияның жоғарғы комиссиясы орналасқанын айтты.

Жергілікті тұрғындардың айтуынша, түнде бірнеше рет жер сілкінісі болып, көшкіннің жүруіне себеп болған. Алты адам көшкіннен қаза тапты, тағы төрт адам жер сілкінісі кезінде құлаған ғимаратта болған.

— Қаза болған 14 адамның екеуі Қытай азаматтары, — деп хабарлады Қытайдың Вануатудағы елшісі Ли Минган.

Зардап шеккендер саны артуы мүмкін. Құтқарушылар жер сілкінісі салдарынан ғимараттарда қалып қойған адамдарды шығару жұмыстарын жүргізіп жатыр.

— Қалада құтқару жұмыстары жүргізіліп жатқан кезде қоғамдық қозғалысты шектеу үшін жеті күндік төтенше жағдай жарияланды, — деп хабарлады жергілікті полиция.

Еске салсақ, Тынық мұхитында Вануату маңында қуатты жер сілкінісі болғаны анықталды.