«Бұл іс тергеліп жатыр. Егер де аталған іс бойынша біреу ақпарат бере алатын болса, онда ережеге сәйкес қандай да бір ынталандыру болуы мүмкін. Алайда, көп хабар түсіп жатса, онда қылмыстық істі ашуға маңызы барлары ғана ескеріледі», - деп атап өтті ресми өкіл.
Бұдан бұрын хабарланғандай, Виктор Храпуновтың іздестіріліп жатқандығы туралы хабар Интерпол халықаралық полиция ұйымының сайтында жарияланды. Алматы қаласының экс-әкімі Виктор Храпуновқа Қаржы полициясы былтыр 20 қылмыстық іс қозғаған болатын. Храпунов лауазымдық өкілеттігін асыра пайдаланып, ірі мөлшерде пара алған. Заңсыз жолмен түсірген қаржыны және бөтеннің мүлкін заңдастырған. Тіпті мұнымен шектелмей, ұйымдасқан қылмыстық топтарды қаржыландыруға дейін барған. Сондықтан да сот оны қамауға алуға санкция берді. Осыған байланысты оған халықаралық іздеу де жарияланды.
Айта кетейік, бүгін Қаржы полициясында өткен брифингте Жемқорлық фактісін хабарлаған адамдар қаржылық түрде ынталандырлатыны хабарланды. «Ағымдағы жылғы 23 тамызда ҚР Үкіметінің қаулысымен сыбайлас жемқорлық құқық бұзушылық фактысы туралы хабарлаған немесе жемқорлыққа қарсы күресте өзге де жолмен жәрдемдескен адамдарды көтермелеу қағидалары бекітілді», - деп атап өтті ресми өкіл.
Бұл қағидалар жемқорлыққа қарсы күресте жәрдемдесетін адамдарды ынталандыру тәртібін анықтайды. Сондай-ақ, оның сөзіне қарағанда, аталған ынталандыру қаржысын алу мақсатында жалған ақпарат хабарлаған азаматтар еліміздің заңдарына сәйкес жауапкершілікке тартылады.