Виктор Орбан Еуроодақ басшылығына бірнеше талап қойды

АСТАНА. KAZINFORM — 15 наурызда аталып өтетін Мажарстан революциясы күні мерекесінде елдің премьер-министрі Виктор Орбан көпшілік алдында сөз сөйледі, деп хабарлайды Kazinform тілшісі.

Биыл Мажарстан революциясының 177 жылдығы аталып өтеді. Бұл ретте Орбан Будапештте өз жақтастарының алдында сөз сөйледі.

Өз сөзінде ол Брюссельді Мажарстанның ұлттық егемендігін шектеуге ұмтылды деп айыптады.

— Біз бүкіләлемдік бостандық үшін күреске жол ашқанымызды, бастамашы болғанымызды  мақтан ете аламыз. Сорос империясының алдында шегінбеген, Брюссельдің алдында тізе бүкпеген және либералды америкалық империяға берілмеген барлық мажарға тағзым! Бүгінде Мажарстан Туы мақтанышпен желбіреп тұр. Біз балаларымыз бен немерелеріміздің алдында жауаптымыз. Олар әрі қарай жолымызды жалғастырады, — деді Мажарстан премьер-министрі.

Ол өз сөзінде 1848 жылғы тарихи 12 тармаққа сілтеме жасай отырып, «Мажарстанның Брюссельге қойылатын талаптарын» баяндады:

• Біз Еуропа ұлттарын құруды талап етеміз.
• Біз заң алдында барлық мүше-мемлекет үшін теңдікті талап етеміз.
• Ұлттардан заңсыз алынған өкілеттіктерді қалпына келтіріңіз.
• Ұлттық егемендік және ұлттық үкіметтер үшін мықты вето құқығы.
• Еуропалық комиссиядан «Сорос агенттерін» алып тастаңыз және жемқор лоббистерді Парламенттен шығарыңыз.
• Еуропалық Одақтың қарызын жойыңыз.
• Ұлттық гвардиямыздың шекарамызды қорғауға кедергі жасамаңыз. Мигранттарды кіргізбеңіз және заңсыз келгендерді қоныс аудартыңыз.
• Мүше-мемлекеттерге жемқорлық жолымен келген доллар мен еуро түспеуі керек.
• Балаларымызды табиғи емес жолмен қайта тәрбиелеуге тыйым салыңыз.
• Еуропаның христиандық мұрасын қорғаңыз.
• Біз Еуропада бейбітшілікті талап етеміз.
• Украинасыз Еуропалық Одақ.

— Мажарстанның мақсаты — ЕО-дан шығу емес, оны іштей өзгерту. Біз сыртқа қарай емес, ішке қарай бағыт алуымыз керек. Оны өзгертуіміз керек, — деді Орбан.

Орбан АҚШ президенті Дональд Трамптың қайта сайлануы және 2024 жылғы еуропалық сайлаудың нәтижелері туралы айта отырып, халықаралық саясат өзгеріп жатқанын, батыс патриоттары күшейіп жатқанын және Мажарстан осы өзгерістердің алдыңғы қатарында екенін атап өтті.

Бұдан бұрын Мажарстан Сыртқы істер және сауда министрі Петер Сийярто 17 ақпан күні Қазақстанға сапары барысында Kazinform агенттігіне эксклюзивті сұхбат берді.