АСТАНА. KAZINFORM — Ақтөбе қаласында волейболдан ерлердің ұлттық лига командалары арасында Қазақстан чемпионаты төртінші кіші турының аясында алаң иелері «Жайықпен» кездесті.
«Жайық» (бас бапкері Виктор Козик) өткен жылы ел чемпионы атанса, Сергей Трикоз жаттықтыратын ақтөбеліктер күміс жүлдені қанағат тұтқан еді.
Бұл жолы «Ақтөбе» алғашқы екі сетте аса қиналған жоқ — 25:20, 25:22.
Үшінші партияда оралдықтар 24:23 есебімен алда тұрып, сетболды пайдалана алмады — 26:28. Қорытынды есеп — 3:0, «Ақтөбенің» пайдасында.
Кеше «Есілді» 3:0 (25:23, 25:16, 25:19) есебімен тізе бүктірген ақтөбеліктер ұпай санын 55-ке жеткізіп, турнир кестесінде бұрынғыша екінші орында келеді.
Талдықорған қаласында өтіп жатқан «В» тобының ойындарында биылғы суперкубок иегері «Жетісу» қамшы салдырар емес. Марат Адрышевтің шәкірттері алдымен «Тараздан» айласын асырды — 3:0 (25:18, 25:19, 25:17).
Бүгін Алматының «Буревестнигін» 3:0 (26:24, 25:22, 25:15) есебімен қапы қалдырған «Жетісу» 59 ұпаймен көш бастап тұр.
Еске сала кетейік, бұдан бұрын волейболдан «Жайық» клубы Ақтөбеде «Атыраудан» басым түскенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).