ТАЛДЫҚОРҒАН. KAZINFORM — Талдықорған қаласында волейболдан ерлердің ұлттық лига командалары арасында Қазақстан чемпионаты үшінші турының бәсекелері басталды.
Алғашқы болып алаңға «Ұшқын-Көкшетау» мен «Атырау» командалары шықты.
Александр Стольников жаттықтыратын көкшетаулықтар небәрі 3 ұпаймен көш соңында келе жатса, атыраулықтар (13 ұпай) алтыншы орында еді.
Тур арасындағы үзілісте «Атыраудың» бас бапкері, сербиялық Деян Вуличевич кетіп, оның орнына Ислам Жұмабеков келді.
Ойын, жанкүйерлер күткеніндей, атыраулықтардың басымдылығымен өтті — 3:0 (25:14, 25:17, 25:20).
Оған қарағанда, «Ақтөбе» (бас бапкері Сергей Трикоз) мен Игорь Никольченко баптайтын «Буревестник» (Алматы) арасындағы матч әлдеқайда тартысты болды.
Ақтөбеліктер 26 ұпаймен екінші орында тұрса, алматылықтар (22 ұпай) төртінші сатыда еді. Бұл жолы «Буревестник» 3:2 (25:21, 16:25, 17:25, 25:21, 15:11) есебімен жеңісті жұлып алды. Сөйтіп 24 ұпай жинап, әзірге үшінші сатыға көтерілді.
Еске сала кетейік, бұдан бұрын Талдықорғанда волейболдан Қазақстан чемпионатының үшінші туры басталатынын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).