АСТАНА. KAZINFORM – Қазақстан ерлер ұлттық құрамасы Бахрейнде 16 маусымда басталатын AVC Ұлттар лигасы (Шақыру кубогы) турниріне қатыспайды.
Қазақстан волейбол федерациясы мәлім еткеніндей, Израиль мен Иран арасындағы қақтығысқа байланысты аймақтағы геосаяси жағдайдың ушығуынан кейін осындай шешім қабылданған.
– Федерация қысқа уақыт ішінде мүмкін болатын балама бағыттарды қарастырды. Алайда олардың ешқайсысы құраманың Бахрейнге уақытында және спортшылардың денсаулығы мен қауіпсіздігіне қатер төндірмей жетуіне мүмкіндік бермеді. Ойыншылар мен бапкерлік құрамның қауіпсіздігі – басты орында. Сол себепті турнирге қатысудан бас тарту туралы шешім қабылданды, - делінген ресми мәлімдемеде.
Еске сала кетейік, бұдан бұрын Азия Ұлттар кубогында Қазақстан әйелдер құрамасының төртінші орынды қанағат тұтқанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).